Bul jóninde Qostanaı oblystyq orman sharýashylyǵy jáne janýarlar dúnıesi aýmaqtyq ınspeksııasy RMM basshysynyń orynbasary Ǵılymhan Moldaǵulov habarlady.
«55 gektar jer qorshalyp, qulandar sonda qystap shyǵady. Kóktemde syrtqa shyǵarylady. Bul aýmaq túz janýarlary úshin óte qolaıly óńir, sýy mol, shóbi shúıgin, qysta qary juqa. Dalany qorǵaýǵa rezervattyń júzden asa qyzmetkeri, ar jaǵyndaǵy Yrǵyz-Torǵaı rezervaty ınspektorlary, ber jaqtaǵy Qazaqstannyń bıoalýantúrlilikti saqtaý assosıasııasyna qaraıtyn Saǵa, Altybaı ańshylyq sharýashylyqtarynyń ıeleri, tabıǵat qorǵaý polısııasy, bizdiń ınspektorlar jan-jaqtan jumyldyrylyp otyr. Qulandardyń moıyndaryna elektrondy qarǵy taǵylyp, ol spýtnık arqyly baqylaýǵa alynǵan», dedi Ǵılymhan Aıtqululy.
Qulandardy qaıta jersindirý jumystaryna qarjy halyqaralyq qorlardan bólinip otyr. Túz ańdaryn ákelý men ósirý sharalary 2017-2020 jyldar aralyǵynda eki kezeń boıynsha júzege asyrylmaq. Keler jyly 16, 2019 jyly da taǵy da 16 qulan Torǵaı aımaǵyna jetkizilmek. Qulandy kóbeıtýge Torǵaı dalasy beker tańdalmaǵany anyq. El ketken soń, mal da ketti, jer bos jatyr. Bylaısha aıtqanda, janýarlar dúnıesine qolaıly, qaýipsiz meken. Qulan – tabıǵı ortada óte tózimdi janýar. Saǵatyna 85 shaqyrym jyldamdyqqa deıin shabady. Jaıylymda tebinge myqty. Iri qulandar salmaǵy 300 kılogramnan asyp jyǵylady. Ǵılymhan Moldaǵulovtyń aıtýyna qaraǵanda, aldaǵy ýaqytta Torǵaı dalasyna Prjevalskıı jylqylary, tipti dýadaq ta qaıtarylýy múmkin.
Názıra Járimbet,
«Egemen Qazaqstan»
Qostanaı oblysy
