Elordadaǵy Ortalyq balalar men jasóspirimder kitaphanasynda «Shabyt» halyqaralyq shyǵarmashyl jastar festıvaliniń «Úzdik ádebı shyǵarma» nomınasııasy boıynsha konkýrsanttardyń tálimgerlermen, belgili aqyndarmen, prozaıktermen jáne qazylar alqasynyń múshelerimen qorytyndy kezdesýi ótti. Dóńgelek ústel basynda shyǵarmashylyq jolyna endi ǵana túsken jazýshylar alǵan áserlerimen bólisip, festıvaldi uıymdastyrýshylarǵa óz daryndaryn kórsetýge bergen múmkindikteri úshin rızashylyqtaryn bildirdi, usynys-keńester tyńdady.
«Bıyl bul nomınasııanyń jańalyǵy - konkýrstyń balalarǵa arnalǵan proza janrynda alǵash ret ótkizilýi boldy. Shyǵarmalardyń kóptep kelip túskendigine tańǵaldyq. 40 eńbektiń ishinen «Shabyt» festıvaliniń marapatyna laıyq úzdik 20-syn tańdap aldyq. Munymen qosa, qazylar alqasynyń da quramy myqty - Qýanysh Jıenbaı, Mádı Aıymbetov, Roza Muqanova - bul qazaq ádebıetiniń jaryq juldyzdary, - dedi baıqaýdyń qazylar alqasynyń tóraǵasy Nesipbek Aıt. - Árıne, qatysýshylardyń budan da kóp bolǵanyn qalaımyz, Olar bir-birimen tanysyp, aralasyp, bir-birin qoldap júretin edi».
Qazylar alqasy músheleriniń aıtýynsha, ádebıetke qatysy joq mamandyq boıynsha bilim alyp júrgendigine, jumys istep jatqandyǵyna qaramastan qatysýshylardyń kóbine úmit artýǵa bolady. Sondyqtan úzdikterdi anyqtaý ońaı bolmaǵan. Baıqaý qorytyndysy boıynsha oryndar kelesideı úlestirildi:
- Mádenıet, muraǵattar jáne qujattama basqarmasynyń arnaıy júldesi semeılik Áıgerim Qıyqbaıǵa buıyrdy.
- Berdibek Soqpaqbaev atyndaǵy taǵy da bir júlde Temirlan Qylyshbekovqa tabystaldy. Jas daryndar dıplomdarmen qosa, 80 myń teńge mólsherinde aqshalaı syılyqtarǵa ıe boldy.
- Atalǵan nomınasııa boıynsha bas júlde men 350 myń teńge Qanat Ábilqaıyrǵa berildi.
- Birinshi oryn men 300 myń teńgeni Baqytgúl Sársembekova oljalady.
- Ekinshi orynda 250 myń teńge alǵan - Arman Álmenbet.
- Úzdik úshtikke Nurbek Nurjanuly da endi. Ol 200 myń teńge aldy.
О́z kezeginde, konkýrsanttar shyǵarmalaryna joǵary baǵa bergen qazylar alqasyna óz alǵystaryn bildirip, qalamdaryn tastamaı, sheberlikterin odan ary shyndaýǵa ýáde berdi.
