Atalǵan fakti boıynsha Qazaqstan Respýblıkasy QK-niń 337-baby (zańsyz ańshylyq) boıynsha qylmystyq is qozǵaldy. Qazirgi ýaqytta jedel-tergeý is-sharasy júrgizilýde, dep habarlaıdy polısııanyń baspasóz qyzmeti.
Osynyń aldynda, 27 qazan kúni Tabıǵat qorǵaý bólimi qyzmetkerleri Jańaqala aýdanyndaǵy Máshteksaı aýyly mańynan «Nıva» kóligine mingen brakonerlerdi qolǵa túsirgende, ańshylardyń kóliginen 3 kıiktiń basy, myltyq, pyshaq, oq tabylǵan edi. Al 2 qarasha kúni túnde Kóshim ózenindegi «Rýbej» baqylaý beketinde toqtatylǵan avtokólik ishinen jańadan kesilip, qapqa salynǵan 80 dana kıik múıizi shyqqan bolatyn.
Jyl basynan beri Batys Qazaqstan oblysynda zańsyz aqbóken aýlaǵany úshin 37 adam ustalǵan eken. Olardyń 18-iniń isi sottan ótip, ártúrli jaza taǵaıyndalsa, qalǵany tergeý satysynda. Brakonerlerden kóptegen qarý-jaraq, qarshana, tipti «Djıp» avtokóligi de tárkilengen.
- Búgingi tańda Qazaqstandaǵy kıiktiń eń kóp popýlıasııasy Batys Qazaqstan oblysynda, Bókeılik dalasynda. Buryn Bókeı ordasy men Jánibek aýdandary aýmaǵynda bolsa, qazir kóbeıip, Jańaqala óńirine de jaıylyp tarap ketti. Bul – keń-baıtaq aımaq, zańsyz ańshylyq jasaýshylar osyny paıdalanyp, erkin qımyldaǵysy keledi. Biraq sońǵy kezde memleket tarapynan aqbókendi qorǵaýǵa erekshe kóńil bólindi. Bul iske bizden basqa barlyq ýchaskelik ınspektorlar, aýmaqtyq ınspeksııa, «Ohotzooprom» RMKM mamandary jumyldyrylǵan. Qazir qural-jabdyǵymyz da saı. Mysaly, bizge úsh aıǵa paıdalanýǵa tikushaq berdi. Kún saıyn áýeden baqylap, aqbókenniń órisin barlap qaıtamyz. Bul – úlken kómek, - deıdi Elaman Satybaldyuly.
Qazaqstan Respýblıkasy aýyl sharýashylyǵy mınıstrligine qarasty Orman sharýashylyǵy jáne janýarlar álemi komıtetiniń deregine qaraǵanda Qazaqstanda kıiktiń jalpy sany 150 myńnan asady. Al Batys Qazaqstan oblysynda jyl basynan beri «Kıikti saqtap qalaıyq!» jobasy qolǵa alynyp, buǵan jaýapty mekemeler birlese qımyldaýda.
Qazbek QUTTYMURATULY,
«Egemen Qazaqstan»
