Elimizdegi eń iri jylyjaı – Ońtústikte

Búginde oblys aýmaǵyndaǵy jylyjaılardyń jalpy kólemi 900 gektarǵa jetti. Muny shotqa qaqsańyz, Qazaqstan boıynsha 80 paıyzdan astam jylyjaıdyń kún shuǵylaly Ońtústikke tıesili ekendigin ańǵartady.

Ordabasy aýdany Badam aýylyna jaqyn ornalasqan «Adelıa» jylyjaıy elimizdegi eń iri keshen bolyp sanalady. 16 gektar jerge qyzanaq pen qııar ekken «Adelıa» jylyjaıynan jylyna eki ret ónim jınalady. Mundaǵy ónim gektaryna 300-350 sentnerden aınalady.

– Qyzanaq terý maýsymynda 180 adamǵa deıin jumysqa qabyldaımyz. Jumys­shy­lardyń ortasha jalaqysy – 80 myń teńge. Al ónimniń 90,95 paıyzyn Reseıdiń teriskeıindegi Novosibir, Krasnoıarsk, Barnaýyl sekildi oblystaryna eksportqa shyǵaramyz. Al bizde suranys azdaý. Sonymen qatar Astana men Almaty qalalaryna da suranysqa qaraı qyzanaq, qııar jetkizip otyramyz. Mundaǵy tehnologııa boıynsha gerbısıdter men ammıak­ty selıtra qosylmaıdy. Zııandy nıtrattar kólemi belgilengen shekten 15 ese tómen. De­genmen jylyjaı kólemin art­tyrýǵa ázirge nıet joq. Oǵan basty sebep qýat kózderiniń qym­battyǵy, – deıdi «Adelıa» jylyjaı keshe­niniń dırektory Baqtııar Asylbek.

Bul keshen ındýstrııalandyrý kartasy­ aıa­synda turǵyzylǵan. Áýelde 5 gektar jerge or­nalasqan jylyjaı jobasynyń alǵashqy kezeńiniń ınvestısııalyq quny 2 673,8 mln teńgege jetken. Ekinshi kezeńniń quny – 2 mlrd 574 mln teńge. Jylyjaı shar­ýashylyǵynyń ónimi ekologııalyq taza. Kókónis ósirýde qol­­­­da­nylatyn tehnologııa sýarmaly sýdy, tyńaıtqyshty jáne basqa da resýrsty únem­deý­ge múmkindik beredi. Qazir jylyjaı 16 gektar jerdi alyp jatyr. 2016 jyly 2 814003 kılo ónim jınalsa, 2017 jyldyń jar­ty jylynda 2 934 669 kılo ónim jınaldy.

Indýstrııalandyrý kartasynyń aıasynda «Adelıany» «QazAgroQarjy» aksıonerlik qo­ǵamy qarjylandyryp otyr. Jeńildetilgen nesıeniń arqasynda aıaǵynan tik turǵan se­riktestik dıqan qaýymyna jaqsy úlgi bolýda. Abyz Abaı aıtqandaı, mundaǵy jumysshylar «eńbek etseń erinbeı, toıady qarnyń tilenbeı» naqylynyń jaıyn jaqsy biledi.

Jarty jylda tórt myń tonna ónim jınaǵan jylyjaı basshylyǵy osynda eńbek etip jat­qan qaýymnyń jalaqysyn berip qana qoımaı, áleýmettik jaǵdaılarynyń ońalýyna da járdemdesedi.

Baqtııar TAIJAN,
«Egemen Qazaqstan»

Ońtústik Qazaqstan oblysy