– Memorıaldyq taqtany ornatýdaǵy maqsat – urpaq jadynda tanymal tulǵa týraly estelik qaldyrý. Biz elimizdiń dańqyn asqaqtatyp, halyq shyǵarmashylyǵyn damytqan jandardy ardaqtaı bilýimiz kerek, – dedi Mádenıet, muraǵattar jáne qujattama basqarmasynyń basshysy Erkebulan Aǵymbaev taqtanyń ashylý saltanatynda.
Zábıra Jubatova 1914 jyly Petropavlda dúnıege kelgen. 1932 jyly óziniń qyzmet jolyn Qaraǵandy radıokomıtetinde bastaǵan. Onda ataqty tulǵalar Qalı Baıjanov, Qosymjan Babaqovpen qatar qyzmet jasaǵan. Keıin, 1947 jyly Qaraǵandy oblystyq fılarmonııasynyń oryndaýshysy bolyp, onda zeınetkerlikke shyqqansha qyzmet etken. Halyq ártisiniń eńbek kitapshasynda nebári eki jazba ǵana bar. Messo-soprano daýys ıesi Uly Otan soǵysy jyldary maıdandaǵy konserttik toptardyń quramynda óner kórsetken.
Erekshe daryn ıesiniń repertýarynda halyq shyǵarmalary, klassıkalyq jáne qazirgi zamanǵy shyǵarmalardan turatyn 200-den astam týyndy boldy.
Zábıra Jubatovanyń jeke muraǵatynan kóptegen qazaq ánderiniń qoljazbalary tabylǵan. Olar – «Daıdıdaý», «Alqońyr», «Bozjorǵa», «Aıttym sálem, Qalamqas», «Tatıananyń haty», «Shahter áni». Sonymen qatar óziniń qoljazba dápterlerinde ol túrli halyqtardyń – tatar, armıan, rýmyn, qytaı, uıǵyr jáne basqalarynyń ánderin jınaǵan.
Mıras ASAN,
«Egemen Qazaqstan»
Qaraǵandy oblysy
