«Nationlook» toptamasynda keshegi men búginginiń, ıaǵnı eski men jańanyń jarasymdy úılesimi kórinis tapqan. Toptama 20 týyndydan turady. Olardyń basym bóliginde avtorlyq oıý-órnekter men tabıǵı teriler qoldanylǵan, ári zamanaýı sán úlgisine saı tigilgen.
Sharanyń basty maqsaty – etnostıldiń halyq arasynda qoldanylý aıasyn keńeıtý, qazaqtyń ulttyq kıimderin úndi sarıi nemese japon kımonosy sekildi tanymaldyq deńgeıine jetkizý.
Kórmege kelgen osy saladaǵy bilikti mamandardyń biri, Eýrazııalyq dızaınerler odaǵynyń múshesi Sergeı Sadykov: «Búgin «Tumar» dep atalatyn balalar kıimderiniń toptamasy kórsetildi. Bul kıimder túrli ulttyq oıý-órnektermen kómkerilgen. Al bul oıý-órnekterdiń óz maǵynasy baryn barlyǵymyz bilemiz. Osy arqyly halqymyzdyń mádenıetin tanytýǵa bolatyny anyq», – dep óz pikirin bildirdi.
Kórsetilim barysynda Qaırolla Ábishevtiń «Zekenmoda» jáne Rahıma Ábishevanyń «Arujan» sán úıiniń toptamalary kórsetildi.
Qaırolla Ábishevtiń shyǵarmashylyq baǵyty negizinen zamanaýı jańǵyrtylǵan toptamalardan turady. Jumystarynyń kópshiligi sońǵy úlgide oryndalsa da, ulttyq naqyshtaǵy elementter kórinis beredi.
«Arujan» sán úıi jáne onyń ıdeıalyq shabyttandyrýshysy – Rahıma Ábishevanyń da toptamalary ózimizge ǵana emes, shetelderge de jaqsy tanys. Sheberdiń qolynan shyqqan «Altyn qum» toptamasy Máskeýde ótken «Joǵarǵy sán» aptalyǵynda qazylar alqasyn tánti etken bolatyn.
Ulttyq mýzeıde dástúrli jáne jańa stıldegi modanyń kórsetilýi bizdiń ulttyq kıimderimizdiń tanymaldylyǵyn arttyrady. Toptamalardy kórsetý sheńberinde mýzeıdiń «Sheber» jáne «Beıneleý óneri stýdııasy» úıirmelerine qatysatyn balalardyń týyndylarynan da kórme uıymdastyryldy.
Talǵat SADYQULY
