Endi avtobýsta tıyn sanap jatpaısyz, elektrondy bılet alý úshin tek uıaly telefon ǵana qajet. Árıne, jolaqyny qolma-qol aqshamen tóleý tásili de saqtalady. Oral qalasynda «Smart city» - «Aqyldy qala» jobasy byltyrdan engizile bastady. Qazirdiń ózinde «Ashyq ákimdik», «onlaın-KSK», «Qaýipsiz aýla» júıesi jumys isteıdi. Endi kezek qoǵamdyq kólikke de jetti.
Elimizde elektrondy bılet jelisin alǵash bolyp almatylyqtar qolǵa alǵan eken. Oral qalasy ákimdiginiń mamandary tájirıbe alý úshin ońtústik astanaǵa arnaıy baryp qaıtqan.
- «SMS BUS» atty jańa joba ázirge qanatqaqty negizde synaqtan ótedi. Aldymen №5, 10, 22 jáne 36-shy qoǵamdyq kólik jolaýshylary jolaqyny onlaın tóleýdiń oń-terisin baıqap kórmek. Joba sátti iske assa, bul tólem júıesin barlyq avtobýsqa engizemiz, - deıdi Oral qalalyq jolaýshylar tasymaly jáne AJ bóliminiń basshysy Qaırat Muhambetqalıev.
Jańa júıeni qoldaný óte ońaı, kez kelgen qarapaıym uıaly telefon da jaraı beredi. Jolaqy tóleý úshin 2505 nomerine avtobýstyń kody jazylǵan sms jiberý kerek. Habarlama tegin. Al qasyńyzdaǵy kisige tólegende, avtobýs kodynan keıin bos oryn qoıyp, onyń telefon nómirin jazyp jiberesiz.
Bir táýiri, jolaqyny telefon balansyndaǵy birlikpen nemese bank kartochkasynan da tóleýge bolady eken.
- Bank kartasymen tóleý úshin jolaýshy aldyn ala smsbus.kz saıtyna kirip, tirkelýi kerek. Kez kelgen banktiń VISA jáne Master Card kartalary qoldanylady. Komıssııa alynbaıdy. Tipti, bank arqyly tólem jasaǵany úshin bonýstar da qarastyrylǵan, - deıdi «SMS BUS» kompanııasynyń ókili Serjan Idııatov.
Qazbek QUTTYMURATULY
«Egemen Qazaqstan»
Oral qalasy
