Kezdesýde Tóraǵa orynbasary Qazaqstan Saýd Arabııasyn Taıaý Shyǵys óńirindegi mańyzdy saıası ári ekonomıkalyq áriptesi retinde sanaıtynyn jáne barlyq salalardaǵy yntymaqtastyqty damytýǵa múddeli ekenin atap ótti. Taraptar ekijaqty negizde jáne parlamentaralyq uıymdar aıasyndaǵy parlamentshilerdiń baılanystaryn odan ári damytý jaıyn talqylady.
«Qazaqstan Prezıdenti N. Nazarbaevtyń ótken jyly qazan aıynda Saýd Arabııasyna jasaǵan resmı sapary eki el arasyndaǵy qarym-qatynastardy jańa deńgeıge kóterýge tyń serpin berdi. Sonymen qatar Elbasynyń bıylǵy 21 mamyrda Er-Rııadta ótken Birikken Arab Ámirlikteri men ıslam elderiniń sammıtine qatysýy Qazaqstannyń terrorızm men ekstremızmge qarsy kúreste ózara yntymaqtastyqty nyǵaıtýǵa degen nıetiniń dáleli», - dedi B.Beknazarov.
Kezdesý barysynda Saýd Arabııasy Koroliniń órkenıetaralyq túsinistikke baǵyttalǵan bastamalary Elbasy N.Nazarbaevtyń bastamasymen ótip kele jatqan, dinaralyq tózimdilik pen túsinistik arqyly halyqaralyq qaqtyǵystardyń aldyn alý jáne sheshýge arnalǵan Álemdik jáne dástúrli dinder lıderleriniń seziniń maqsattarymen úndes ekeni aıtyldy. Tóraǵa orynbasary saýd tarapyn kelesi jyly ótetin VI sezdiń jumysyna qatysýǵa shaqyrdy.
Kezdesý sońynda Saýd Arabııasy Koroldigi Konsýltatıvtik keńesi delegasııasynyń basshysy Ahmad ál-Hamdı elimizdiń qarqyndy damýy týraly aıta kelip, túrli salalarda ózara tıimdi áriptestikti nyǵaıtýǵa ázir ekenin de atap ótti.
