Keıde týrısterge nemese saıahatshylarǵa monýmenttiń ózinen onyń turǵyzylý tarıhy tartymdyraq. Onyń mádenı jáne tarıhı eskertkish retindegi alatyn orny týraly da aqparat alǵysy keledi. Dátke qýat deıtinimiz, dalamyzdyń tórinde birqatar tarıhı keseneler saqtalyp qaldy. Sonyń arqasynda bul arheologııalyq eskertkishter ulttyń shyn mánindegi qundylyǵyna aınaldy.
Sonymen «Qazaqstan ańyzdary» jarnamalyq sharasy aıasynda, Qazaqstannyń qasıetti jerleri – Aısha bıbi kesenesi, Qoja Ahmet Iаsaýı kesenesi jáne arheologııalyq qazbalar nátıjesinde tabylǵan eń tanymal jádiger «Altyn adam» týraly túsirilgen beınebaıandar bıyl 4 qarashadan bastap BBC World News telearnasynda kórsetile bastady. Beınerolıkterdi Mádenıet jáne sport mınıstrliginiń tapsyrysy boıynsha BBC ókilderi jáne Sh.Aımanov atyndaǵy «Qazaqfılm» kınostýdııasy birlesip túsirgen.
Beınerolıkterdiń túsirilimderi ústimizdegi jyldyń qyrkúıek aıynda «Qazaqfılm» kınostýdııasynyń aýmaǵy men Esik, Úshqońyr, Túrkistan, Qapshaǵaı qalalarynda ótti. Jobany júzege asyrýǵa otandyq jáne sheteldik mamandar tartylǵan. Beınebaıandardan Ońdasyn Besikbasov, Nurlybaı Esimǵalıev, Shuǵyla Saparǵalı, Aıan О́tepbergen, Dınara Baqtybaeva, Farıza Eskermes sııaqty otandastarymyzdy kórýge bolady.
– Osy jyly kóktemde Elbasy rýhanı jańǵyrý aıasyndaǵy basty joba retinde – «Qasıetti Qazaqstandy» ataǵan bolatyn. Ulttyq kodymyzdyń negizi bolyp tabylatyn, halqymyzdyń baı murasy men mádenıetin nasıhattaý úshin, «Qazaqfılm» kınostýdııasy BBC World News telearnasymen birlese otyryp, «Qazaqstan ańyzdary» atty jarnamalyq kampanııany bastap ketti. Kampanııanyń basty maqsaty – syrtqy jáne ishki mádenı týrızmdi damytý. Bul bastama óz kezeginde jahandyq básekelestikke jutylmaýdyń bir quraly bolyp tabylady, dedi Sh.Aımanov atyndaǵy «Qazaqfılm» kınostýdııasynyń vıse-prezıdenti Serik Jubandyqov.
Qysqasy, BBC World News telearnasyna jol tartqan túsirilim tobynda rejısser Darıa Chernova (London), qoıýshy operator Denıs Alarkon-Ramıres (Máskeý), qoıýshy sýretshi Bópesh Jandaev (Qazaqstan) bar.
Aınash ESALI,
«Egemen Qazaqstan»
ALMATY
