Danelııa daýsynyń ereksheligimen buǵan deıin de 2015 jyly «Aıalaǵan Astana» ulttyq irikteý synynda bas júldeni jeńip alyp, halyqaralyq «Jańa tolqyn» balalar baıqaýyna joldama alǵan bolatyn. Sol joly Qazaqstan atynan án shyrqaǵan kishkentaı ánshi Halyqaralyq televızııalyq baıqaýda «Kórermen kózaıymy» júldesimen oralǵany este.
Eldiń nazaryna eki jyl buryn ilikken Danelııa segiz jasynda Igor Krýtoı, Fılıpp Kırkorov, Sergeı Lazerev syndy qazylar alqasynyń qoshemetine bólenip, áıgili ánshilerdiń árqaısysy oǵan 11 upaıdan baǵa berip, myrzalyq tanytqan bolatyn.
Endi bıyl 10 jasqa tolǵan Tóleshovaǵa «Golos. Ditı» shoýynyń ánshini kórmeı baǵalaý kezeńinde qazylar alqasynyń barlyq múshesi birdeı burylýǵa sanaýly sekýndtar ǵana jetkilikti boldy. On jastaǵy Tóleshova 10 sekýndta tóreshilerdi ózine qaratty.
Oraıy kelip turǵanda, ýkraınalyq shoýdyń tórtinshi maýsymyna Dıma Monatık, «Vremıa ı Steklo» toby men Natalıa Mogılevskaıa syndy tanymal ánshiler tálimger bolǵanyn aıta ketelik. Baıqaýdyń aldyńǵy kezeńderinen sátti ótken qazaqstandyq balaqaı baıqaýdyń «soqyr tyńdaý» týrynda Demı Lovatonyń «Stone Cold» ánin oryndady. Baıqaý tóreshilerin ánniń alǵashqy notalarymen-aq baýrap alǵan baldyrǵannyń oryndaýyndaǵy bul ánniń kompozısııasy eresek mýzykanttardyń ózine baǵyna bermeıtin kúrdeliligi bar.
Danelııanyń daýsynyń tunyqtyǵyna tánti bolǵan Natalıa Mogılevskaıa «Golos. Ditı» baıqaýynda buryn-sońdy bul ándi osynshalyqty sheberlikpen oryndaǵan baldyrǵannyń bolmaǵandyǵyn atady. Jarysta qazylar alqasynyń músheleri túgel Danelııaǵa tálimger bolýǵa yqylas tanytsa-daǵy, talantty jerlesimiz Dıma Monatıktiń komandasynda ári qaraıǵy ánshilik baǵyn synaýǵa sheshim qabyldady.
Osylaısha on jastaǵy almatylyq balǵyn ýkraınalyq shoýdyń juldyzyna aınalyp tur.
Aınash ESALI,
«Egemen Qazaqstan»
ALMATY
