Qazaqstan men Reseı joǵary oqý oryndary rektorlarynyń forýmy qarsańynda Qyzdar ýnıversıtetiniń rektory Gaýhar Aldambergenova men Ońtústik Oral memlekettik gýmanıtarlyq-pedagogıkalyq ýnıversıtetiniń rektory Vladımır Sadyrın ózara kelisim ornatyp, birlesip jumys atqarýǵa ýaǵdalasty.
Qujat akademııalyq utqyrlyq baǵdarlamasy aıasynda stýdentter, professor-oqytýshylar men ǵylymı qyzmetkerler almasýdy, birlesip ǵylymı-zertteý jobalaryn ázirlep, júzege asyrýdy, bilim berý men mádenı baılanystardy arttyrýǵa baǵyttalǵan konferensııalar, semınarlar men jıyndardy úılestirýdi qarastyrady.
Sondaı-aq, memorandýmda akademııalyq aqparattarmen, oqý-ádistemelik quraldarmen jáne materıaldarmen bólisý, ózara kelisim-sharttar negizinde basqa da akademııalyq yntymaqtastyqtar ornatý kózdelgen.
Kezdesýde Qazaq memlekettik qyzdar pedagogıkalyq ýnıversıtetiniń rektory Gaýhar Aldambergenova qos joǵary oqý ornynyń ortaq uqsastyǵy jaıynda sóz qozǵap, taraptar ǵylymı-mádenı qarym-qatynastardy nyǵaıtýǵa baǵytalǵan ózara tıimdi ekijaqty damytý máselelerin talqylady.
– Taǵylymdy tárbıe men óristi bilimniń irgeli ordasy atanǵan, kópshilik qaýym «izettilik pen úlgi-ónege otaýy» dep at qoıyp, aıdar taqqan Qazaq memlekettik qyzdar pedagogıkalyq ýnıversıteti pedagogıkalyq kadrlardyń qalyń shoǵyryn daıyndaýǵa súbeli úles qosyp kele jatqan ulaǵat uıasy. 70 jyldan astam ýaqyt belesinde ǵasyrlarǵa tatıtyn asa aýqymdy ózgerister boldy. Qoǵamdyq qatynastar almasty, qundylyqtar jańardy. Mine, osyndaı tarıh tezinen ótken, bilim men ǵylymdy damytý jáne qyzdarǵa pedagogıkalyq bilim berý, belsendi azamattyq ustanymy bar mamandar daıarlaý basty mıssııasy bolyp tabylatyn oqý ornynyń 6 fakýltetinde 43 bakalavr mamandyq boıynsha, magıstratýrada 23 mamandyq boıynsha, 4 PhD mamandyǵy boıynsha 9 myńǵa jýyq stýdent, magıstrler men doktoranttar bilim alýda. Olarǵa 55 ǵylym doktory, 230-dan astam ǵylym kandıdaty men 90-ǵa jýyq ǵylym magıstri dáris beredi, – dep atap ótti Gaýhar Tóremuratqyzy.
Qazirgi tańda Qyzdar ýnıversıteti álem elderiniń 19-dan astam joǵary oqý oryndarymen yntymaqtastyq ornatqan. Olardyń qatarynda AQSh, Úndistan, Fransııa, Qytaı, Germanııa syndy memleketterdiń bedeldi ýnıversıtetteri bar.
О́z kezeginde Ońtústik Oral memlekettik gýmanıtarlyq-pedagogıkalyq ýnıversıtetiniń rektory Vladımır Sadyrın eki eldiń joǵary oqý oryndary arasyndaǵy baılanystyń arta túsetindigine senim bildirip, yntymaqtastyqty damytýǵa nıetti ekendigin jetkizdi.
Aıta keteıik, keshe Reseıdiń Chelıabi qalasynda Qazaqstan men Reseı joǵary oqý oryndary rektorlarynyń forýmy ótti. Qazaqstan men Reseı prezıdentteriniń qatysýymen ótetin XIV aımaqaralyq yntymaqtastyq forýmy aıasynda uıymdastyrylyp otyrǵan alqaly jıynǵa Qazaqstan men Reseıdiń Bilim jáne ǵylym mınıstrleri, 49 qazaqstandyq jáne 77 reseılik joǵary oqý oryndarynyń basshylary qatysty. Keńes jumysy «Bilim – adamı kapıtal sapasynyń básekege qabilettiligin arttyratyn negizgi faktor», «Zamanaýı joǵary oqý ornynyń ınnovasııalyq qyzmetin damytý jáne yntalandyrý», «Qazaqstan men Reseı joǵary oqý oryndarynyń strategııalyq áriptestik qarym-qatynasyn damytý: joǵary bilim berýdiń halyqaralyq ólshemi» atty baǵyttar boıynsha júrgizildi.
