Onda Qazaqstan Prezıdenti balmuzdaq pen ashytylǵan sútten jasalǵan ónimderdi kórip, olardy óndirýdiń tehnologııalyq úderisimen tanysty.
Sonymen qatar, Memleket basshysy oblystaǵy aýyl sharýashylyǵy kásiporyndary jetekshilerimen áńgimelesti.
Elbasy óńirdiń áleýmettik-ekonomıkalyq damý kórsetkishteri, sonyń ishinde ónerkásip pen aýyl sharýashylyǵy salasynyń ósip kele jatqanyn atap ótti.
– Sońǵy ýaqytta oblysta, ásirese áleýmettik salada kóp jumys atqarylýda. Sport keshenderi, oıyn-saýyq jáne saýda ortalyqtary salynyp jatyr. О́nerkásip kólemi artýda, oblys agrarlyq-ónerkásiptik óńirge aınalyp keledi, – dedi Nursultan Nazarbaev.
Qazaqstan Prezıdenti elimizdiń zamanaýı kólik ınfraqurylymyn qalyptastyrý aıasynda oblys ekonomıkasy úshin joldar jelisin damytýdyń mańyzdy ekenin aıtty.
– Jol degenimiz – ómir. Zamanaýı joldardyń salynýy ekonomıkany damytyp, ónimimizdiń baǵasyn arzandatýǵa jáne onyń básekege qabilettigin arttyrýǵa septigin tıgizýge tıis, – dedi Memleket basshysy.
Sondaı-aq, Elbasy agroónerkásip keshenin damytýda ǵylymdy, ǵylymı jetistikterdi paıdalanýdyń mańyzdylyǵyn erekshe atap ótti.
– Ǵylym aýyl sharýashylyǵynda kóp máseleni sheshedi. Qazaqstanda úsh agrarlyq ýnıversıtet bar, olardyń árqaısynyń óz baǵyty bar. Sizder ǵylymnan aýyl sharýashylyǵy úshin qajettini talap etýge tıissizder, – dedi Nursultan Nazarbaev.
Kezdesý sońynda oblys eńbekkerleri Qazaqstan Prezıdentine aýyl sharýashylyǵy salasyna memleket tarapynan kórsetilip jatqan qoldaý úshin alǵys bildirdi.
