Parlament depýtattary, ortalyq memlekettik organdar men ulttyq kompanııalardyń ókilderi elimizge ınvestısııa tartýdyń jaı-kúni men keleshegi týraly máselelerdi qarady.
Senattyń Ekonomıkalyq saıasat, ınnovasııalyq damý jáne kásipkerlik komıtetiniń tóraǵasy Asqar Beısenbaev Prezıdent Joldaýynda Qazaqstan sheteldik ınvestısııany tartýda, onyń ishinde «Astana» halyqaralyq qarjy ortalyǵy aıasynda qarjy resýrstaryn tartý esebinen aımaqtaǵy kóshbasshy qalpyn saqtaý mindetin alǵa qoıǵanyn atap ótti.
A. Beısenbaev halyqaralyq yntymaqtastyq aıasynda ulttyq ekonomıkalyq múddeni qorǵaý men ilgeriletýdi qamtamasyz etýge, ol úshin «ekonomıkalyq dıplomatııaǵa» serpin berýge shaqyrdy. Senator sheteldik ınvestısııany tartýda basshylar men ákimderdiń jaýapkershiligin arttyrý, sondaı-aq ınvestısııalyq ahýaldy jaqsartýǵa jáne ınvestorlarǵa arnalǵan bıýrokrattyq rásimderdi ońaılandyrýǵa arnalǵan zań erejelerin qabyldaý týraly aıtty.
A.Beısenbaev ınvestısııalyq jumystarǵa arnalǵan quqyqtyq bazany qamtamasyz etý úshin Parlament sońǵy jyldarda Kásipkerlik kodeksin, «Arnaıy ekonomıkalyq aımaqtar týraly», «Memlekettik-jekemenshik áriptestik týraly» jáne basqa da zańdardy qabyldaǵanyn aıtty.
Investısııalar jáne damý mınıstriniń orynbasary Erlan Haırov elimizdiń Ulttyq bankiniń málemetteri boıynsha Qazaqstannyń ekonomıkasyna 2005 jyldan bastap 2017 jylǵy alǵashqy jarty jyldyǵyna deıin 253,9 mıllıard dollar tikeleı ınvestısııa kelgenin baıandady. Bul rette 2017 jyldyń alǵashqy jarty jylynyń qorytyndysy boıynsha sheteldik tikeleı ınvestısııanyń jalpy kólemi 10,5 mıllıardty qurady, ol 2016 jylǵy osy kezeńmen salystyrǵanda 8,6 paıyzǵa kóp bolyp otyr.
Odan basqa, «Úshinshi jańǵyrý» mindetterine sáıkes, Investısııalar jáne damý mınıstrligi sheteldik tikeleı ınvestısııa kólemin arttyrý úshin Dúnıejúzilik bankiniń sarapshylarymen birlese otyryp, 2017-2022 jyldarǵa arnalǵan Ulttyq ınvestısııalyq strategııa ázirlep, qabyldanǵan bolatyn. Osy strategııaǵa sáıkes, 2022 jylǵa qaraı sheteldik tikeleı ınvestısııa aǵynyn 1,26 esege ulǵaıtý, tıimdilikke baǵdarlanǵan sheteldik tikeleı ınvestısııany 1,5 ese ulǵaıtý kózdelip otyr. 2022 jylǵa josparlanǵan sheteldik tikeleı ınvestısııanyń jalpy kólemi 122 mıllıard dollardy quraıdy.
Syrtqy ister mınıstriniń birinshi orynbasary Muhtar Tileýberdi SIM-niń ınvestısııalyq yntymaqtastyq salasyndaǵy jumysy týraly habardar etti. M.Tileýberdiniń aıtýynsha, úkimettiń ekonomıkalyq bóligimen birlese otyryp, jaýapkershilik aımaqtaryn belgileýmen qatar ınvestısııalyq jáne eksporttyq baǵyttar boıynsha ózara is-qımyl tetikteri ázirlenip jatyr. Barlyq memlekettik organdar men syrtqy saladaǵy uıymdardyń qalypty jumysyn úılestirý úshin «baılanysatyn birinshi adam» mańyzdy rólin atqaratyn sheteldegi mekemeler men sheteldik bıznes qaýymdastyǵymen «baılanystyratyn býynmen» qosa SIM-niń barlyq áleýeti iske qosyldy. Atap aıtqanda, sheteldik ınvestısııa tartý jónindegi jumystardy kúsheıtý úshin halyqaralyq salada basymdyqqa ıe elderdegi Qazaqstan elshilikterinde ınvestısııalar jónindegi keńesshiler taǵaıyndaý týraly Memleket basshysynyń tapsyrmasy júzege asyrylýda.
Ulttyq ekonomıka mınıstriniń orynbasary Aıbatyr Jumaǵulovtyń sózinde memlekettik-jekemenshik áriptestikti damytý jáne onyń ınvestısııalyq salamen baılanysy, «Samuryq-Qazyna» kompanııalaryn jekeshelendirý jáne syrtqy ınvestorlardy tartý úshin IRO-ǵa shyǵarý máseleleri qozǵaldy.
Qarjy mınıstriniń orynbasary Rýslan Beketaev Qazaqstan Dúnıejúzilik Bankiniń «Doing Business 2017» reıtınginde 16 satyǵa kóterilip, 35-shi orynǵa ıe bolǵanyn habarlady. Elimiz «Doing Business 2016-da» 51-shi oryn alǵan bolatyn.
R.Beketaevtyń aıtýynsha, ınvestorlardy qoldaý úshin salyq jáne keden rásimderin jaqsartýdyń, bızneske ákimshilik qysymdy tómendetýdiń birqatar sharalary qabyldanyp jatyr. Jańa Salyq kodeksin, «Qazaqstan Respýblıkasyndaǵy kedendik retteý týraly» kodeksin qabyldaý, sondaı-aq Eýrazııalyq Ekonomıkalyq Odaqtyń Keden kodeksin ratıfıkasııalaý Qazaqstan ekonomıkasyna ınvestısııa tartýǵa serpin beretin bolady. Bul qujattarǵa sáıkes, salyq tekserýleriniń sany azaıyp, qosymsha qun salyǵyn qaıtarý rásimi ońtaılanady, kedendik ákimshilendirýdi sandyq negizge kóshirý júzege asyrylady.
Sondaı-aq «Samuryq-Qazyna» ulttyq ál-aýqat qory» AQ úkimetpen ózara is-qımyl jónindegi basqarýshy dırektory Nurlan Rahmetov, «Qazaqstan damý banki» AQ basqarma tóraǵasy Bolat Jámishev, «QazaqInvest» ulttyq kompanııasy» AQ basqarma tóraǵasynyń mindetin atqarýshy Meıirjan Maıkenov sóz sóıledi.
Dóńgelek ústeldiń qorytyndysy boıynsha memlekettik organdarǵa jiberiletin usynystar qabyldandy jáne olar budan bylaıǵy zań shyǵarý jumystarynda eskeriletin bolady.
