AFC prezıdenti Ádilbek Turǵynbaev atalmysh týrnır aralas jekpe-jek sportyna jańa serpin alyp keletinin jetkizdi. Iаǵnı, atalmysh tujyrym Qazaqstanda aqyly onlaın-kórsetilimdi damytpaq. Osyǵan deıin, AFC promoýterlik kompanııasy tájirıbe júzinde 2017 jyldyń 1 sáýirinde ótken «Alash Aıbary» halyqaralyq týrnırin tegin onlaın júıesinde kórsetken edi. Qorytyndysynda jarysty 17 myń adam tikeleı efırde tamashalaǵan. Osy oraıda, Ádilbek Turǵynbaev Qazaqstanda PPV-ti (aqyly onlaın-kórsetilim) damytý kerektigin alǵa tartyp otyr. Mıllıondaǵan somma ketetinine qaramastan AFC promoýterlik kompanııasy reseıdiń beldi tujyrymy Fight Nights-pen birigip, halyqaralyq týrnır ótkizýdi qolǵa aldy. Shyǵyndy eki promoýshen bólip almaq. Uıymdastyrýshylardyń aıtýynsha, shyǵynnyń jarty baǵasy 46 mıllıon teńgeni quraǵan. Aldaǵy ýaqytta qalyń kórermen osy jáne ózge segizburysh básekelerin AFC caıty MMA.VISION.COM arqyly tikeleı efırde kóre alady.
26 qarashada ótetin aýqymdy keshtiń basty jekpe-jeginde Qýat "Naıman" Hamıtov ırlandııadyq Pıter Kýıllımen sheberlik baıqasady. Irlandııalyq maıtalman álemdik reıtıngte úzdik on sportshynyń qataryna kiredi. Pıter UFC juldyzy Konor MakGregordyń sparrıng-seriktesi. «Naıman» laqap atyna ıe Qýat Hamıtov óziniń jarqyn ári tabysty jekpe-jekterimen kópshilikke jaqsy tanys. Sondaı-aq, týrnır barysynda QAZAQ 70 gran-prıi ótedi. Gran prıge 70 keli salmaqta Murat Baqtorazov, Myrza Erkinbek, Oljas Esqaraev, Altynbek Baqtygeldınov, Artem Reznıkov bastaǵan 12 sportshy synǵa túsedi. Osy keshte qalyń jankúıer Fight Nights nusqasynyń chempıony Georgıı Kıchıgın men Magomed Nýrov jáne Jalǵas Jumaǵulov pen Shadj Hek arasyndaǵy jekpe-jekti tamashalaı alady.
Arman OKTIаBR,
«Egemen Qazaqstan»
ALMATY
