Kámshat apa jastaıynan, tipti 14 jasynan eńbekke aralasqan. 1966 jyly mehanızatorlyq kýrsty bitirgennen keıin Meńdiqara aýdanyndaǵy «Harkov» sharýashylyǵynda aldymen traktorshy, odan keıin mehanızator bolyp 30 jyl eńbek etti. Ol shaǵyn tehnıkaarmen qatar K-701 ónimdi traktoryn da jaqsy ıgerdi. Olystyq, respýblıkalyq jarystarda júldegen atandy. Eńbekqorlyq Kámshatty dańqqa bóledi. Kámshat Baıǵazyqyzy aýyl sharýashylyǵyndaǵy jumysymen qatar, ár jyldary Keńes Odaǵy Kommýnıstik partııasy esep komıısıasynyń múshesi, KSRO Ulttar keńesi tóraǵasynyń orynbasary boldy, Qazaq KSR Joǵary Keńesiniń depýtaty mindetin atqardy.
Kámshat apa qazaqtyń dana qyzdarynyń biri edi. Áıeldik bııazylyqtyń, náziktiktiń naǵyz úlgisi bola bildi. Ol bir otbasynyń uıtqysy, tórt bala tárbıelep, ulyn uıaǵa, qyzyn qııaǵa qondyrdy.
Kámshattyń traktor rýline otyrýy óz zamandastarynyń rýhyn kóterdi, jastardyń úlgi tutar tulǵasyna aınaldy. Jastar Kámshatqa eliktedi. Kámshattyń qurmetine talaı qazaq otbasynda týǵan nárestege onyń aty qoıyldy. Kámshattyń búkil ǵumyry eńbekti súıýden, elge, týǵan jerge degen asqaq sezimnen turady. Oǵan eliktep, qazaqtyń talaı jastary traktor rýline otyrdy, jumysshy mamandyǵynyń bedeli artty.
Ol qarapaıym eńbek adamynan qazaqtyń Kámshaty dárejesine kóterildi. Kámshatpen birge tutas dáýir kóship bara jatqandaı...
Názıra Járimbet,
«Egemen Qazaqsan»
Qostanaı
