Memleket basshysynyń «Rýhanı jańǵyrý» baǵdarlamasynyń aıasynda uıymdastyrylǵan bıylǵy baıqaý úsh kezeń boıynsha ótti. «О́leń sózdiń patshasy» dep atalǵan alǵashqy kezeńde qatysýshylar Abaıdyń bilim, ǵylym jáne óner taqyryptaryna órilgen poezııalyq shyǵarmalaryn nemese qara sózderin naqyshyna keltirip jatqa oqý arqyly synǵa tústi. Al, «Qazaqta qara óleńge des bermedim» degen atpen ótken ekinshi kezeńde Muhtar Áýezovtiń áıgili «Abaı joly» romanynan úzindi oqydy. «Qulaqtan kirip boıdy alar» kezeńinde qatysýshylar Abaı ánderin áýelete oryndap, kópshiliktiń rızashylyǵyna bólendi.
Uıymdastyrýshylar úmitkerlerdiń ónerin baǵalaý kezinde olardyń kórkem mátindi tańdaý talǵamyna, óleń oqý sheberligine, qazaq tiliniń orfoepııalyq normalaryn saqtap sóıleýine, án oryndaý naqyshyna, sahnalyq óner kórsetý mádenıetine jáne qazaqtyń ulttyq kıim úlgisine basa nazar aýdarylǵanyn aıtty.
Halyqaralyq Abaı qorynyń dırektory Jumabek Ashýuly, M.Áýezov atyndaǵy óner ınstıtýtynyń «Abaı jáne jańa dáýir ádebıeti» bóliminiń meńgerýshisi Qorabaı Serikqazy, «Almaty aqshamy» gazeti redaktorynyń orynbasary Áýelbek Ánýarbek baıqaýǵa qazylyq etti.
Baıqaý qorytyndysyna sáıkes QazMQPÝ, fılologııa fakýltetiniń 2 kýrs stýdenti Týrsýnoı Ýlýgqyzy júzden júırik dep tanylyp birinshi oryndy enshiledi. Halyqaralyq qazaq-qytaı til kolledjiniń shákirti Lıýbomıla Moıseenko ekinshi oryn ıegeri atansa, júldeli úshinshi oryn QazMQPÝ stýdenti Tahmına Iýsýpjanovaǵa buıyrdy. Jeńimpazdar men júldegerler arnaıy dıplomdar, sondaı-aq baǵaly syılyqtarmen marapattaldy.
– Baıqaýdyń basty maqsaty qazaq tiliniń qoldanylýyn damytý arqyly memlekettik til saıasatyn nasıhattaý. Abaı shyǵarmashylyǵyn nasıhattaý men qoǵamdyq kelisim men qazaqstandyq rýhanı birlikti nyǵaıtý jáne otansúıgishtik sezimge tárbıeleý, kópshiliktiń qazaqtyń ulttyq mádenıeti men ónerine, ádebıeti men tiline degen yqylasyn arttyrý, jastar arasynda kitap oqý mádenıetin damytý. Baıqaýǵa qatysqan ózge ult ókilderiniń qazaq tiline degen qurmeti men Abaı shyǵarmashylyǵyna degen súıispenshilikteri kóńil qýantady, – deıdi Tilderdi damytý basqarmasynyń bólim basshysy Baqyt Qalymbet.
Arman OKTIаBR,
«Egemen Qazaqstan»
ALMATY
