«Biz eki myńǵa jýyq stýdentti kásipkerlik kýrsynan oqytyp shyǵardyq. Olardyń 5-7 paıyzy bıznespen aınalysýǵa nıetti. Qazir 7 ınvestısııalyq raýnd ótkizilip, olardyń barysynda stýdentter quny 21 mıllıon rýbl bolatyn 48 joba satyp úlgerse, 58 jumys orny quryldy jáne 2 mıllıon rýblge jýyq salyq tólendi. Biz reseılik joǵary oqý oryndary men bıznes-qaýymdastyqtaryna qyzmetter, aýyl sharýashylyǵy, tehnıkalyq kásipkerlik syndy túrli baǵyttar boıynsha halyqaralyq start-ap jobalardy qurý isine qatysýdy usynamyz», – deıdi G. Ahmetova.
Eki el arasyndaǵy forým barysynda oblystyq týrızmdi damytý basqarmasynyń habarynsha, Baıanaýyl demalys aımaǵyn, «Ertis ormany» qaraǵaı ormanyn, óńirdegi qasıetti jerler men tuzdy kólderdegi medısınalyq týrızm týraly da materıaldar usynyldy. Kórmege kelgen kóptegen qatysýshylar Baıanaýyldy da kóbi biledi, tipti, onda taý shańǵysy bazasy salynyp jatqanynan da habardar.
Sondaı-aq, Pavlodar oblysynyń ákimi Bolat Baqaýov pen Bashqurtstan prezıdenti Rýstem Hamıtov arasynda Chelıabide ótken Qazaqstan men Reseıdiń HIV óńiraralyq yntymaqtastyq forýmy sheńberinde saýda-ekonomıkalyq, ǵylymı-tehnıkalyq jáne gýmanıtarlyq salalar boıynsha kelisimderge qol qoıyldy.
«Bashqurtstanda da bizdiń óńirdegideı munaı-hımııa klasteri bar. Sondyqtan tájirıbelerimen bólisý úshin ózimizge shaqyryp otyrmyz. Kóptegen pavlodarlyq stýdentter Bashqurtstanda munaı-hımııa isinen bilim alady, olardyń oqytýshylary Pavlodarda dáris oqıdy», – dedi B. Baqaýov. Bashqurtstan prezıdenti de eki óńir arasynda yntymaqtastyq jasaýǵa ortaq jumystar bar ekendigine toqtaldy.
Farıda BYQAI,
«Egemen Qazaqstan»
