Rejısserdyń aıtýynsha úrkin-qorqyn zamanda týǵan jerinen Aýǵanstanǵa kóshýge májbúr bolǵan, ondaǵan jyldar ótken soń atajurtyna qaıta oralǵan qandastarymyzdyń taǵdyry beınelengen bul fılm nemisterge de jat emes kórinedi.
«Fılmniń Germanııanyń festıvaline qatysatynyna qýanyshtymyn. Meniń týǵan aýylym Aldabergende nemister kóp turatyn. Synyptastarymnyń jartysy nemister edi. Kóbi 80 jyldardyń aıaǵynda tarıhı otandaryna ketti. Olar da atamekenderinde túrli qıyndyqqa tap boldy. Sondyqtan da repatrıanttar taqyryby búkil álemde ózekti», - deıdi Sábıt Qurmanbekov.
Halyqaralyq Mangeım-Haıdelberg kınofestıvali 1952 jyldan beri ótkizilip keledi. Festıval kınoındýstrııanyń kásibı mamandaryna jáne kınosúıer qaýymǵa arnalǵan. Jyl saıyn festıvalge 500 kásibı maman men 60 myń kórermen qatysady. Onda «Úzdik fılm», «Arnaıy júlde», «Jetistikteri úshin arnaıy júlde» sııaqty atalymdar boıynsha úzdikter anyqtalady. Negizgi konkýrstyq júldeden basqa festıval aıasynda kınoteatr ıegerleri jáne Halyqaralyq kınobaspasóz federasııasy da (FIPRESSI) ózderiniń marapattaryn tabystaıdy. Sondaı-aq, «Kórermender kózaıymy» júldesi de beriledi.
Bıyl otandyq kartınadan basqa 22 elden 21 kartına festıvaldiń bas júldesine talasady. Olardyń qatarynda Fransııa, Argentına, Danııa, Estonııa, Islandııa, Úndistan, Iran, Izraıl, Túrkııa, AQSh, Germanııa sııaqty elder bar.
Jeńimpazdar esimi 19 qarasha kúni festıvaldiń jabylý saltanatynda jarııalanady.
Aıta keteıik, osy jyldyń jeltoqsanynda Bashqurtstanda ótetin IV halyqaralyq «Kúmis Aqbozat» kınofestıvaliniń ashylý saltanaty «Oralman» fılmimen ashylady.
«Oralman» kórkem fılmi osy jyldyń basynda Irannyń astanasy Tegeranda ótken XXXV halyqaralyq Fadjr kınofestıvali men XIII halyqaralyq «Eýrazııa» kınofestıvaliniń bas júldesin jeńip alǵan bolatyn. Fılmde basty róldi somdaǵan akter Dýlyǵa Aqmolda qyrkúıek aıynda Tatarstanda ótken XIII Halyqaralyq musylmandar kınosy festıvalinde «Úzdik er adam róli» júldesimen marapattaldy. Sondaı-aq, kartına Italııada ótken HH Halyqaralyq «Religion Today» kınofestıvalinde «Úzdik fılm» nomınasııasynda jeńiske jetip, táýelsiz SIGNIS qazylar alqasynyń arnaıy júldesin ıemdengen edi.
