"Úlken Eýrazııa - 2027" teketires pen seriktestik" atty halyqaralyq pikirtalas alańy eki kúnge sozylady. Jıynǵa 27 elden 60-tan astam saıası qaıratkerler, bedeldi ǵalymdar men birqatar damyǵan eldiń "aqyl-oı ortalyqtarynyń" sarapshylary keldi. Olardyń qatarynda Túrkııanyń burynǵy prezıdenti Abdolla Gúl, Slovenııanyń burynǵy basshysy Danılo Tıýrk jáne Chehııanyń eks- prezıdenti Vaslav Klaýs bar. Bir aıta keterligi, jıynǵa Elbasy Nursultan Nazarbaev ta qatysýda.
Qazaqstan Respýblıkasy Tuńǵysh Prezıdenti - Elbasy qorynyń atqarýshy dırektory Qanat Jumabaevtyń aıtýynsha, Astana klýby aýqymyndaǵy Eýrazııanyń úlken túıitkildi máseleleri men onyń keleshegi jóninde sarapshylyq talqylaýlar, Elbasy Nursultan Nazarbaev árdaıym nasıhattaıtyn ashyqtyq pen teń qarym-qatynas ustanymyna negizdelgen jahandyq saıası dıalogty nyǵaıtýǵa qosylǵan súbeli úles bolyp sanalady. Klýb músheleri aldaǵy onjyldyqta qurlyqtyń damý baǵdaryn aıqyndaıtyn negizgi úrdisterdi talqylaıdy.
Astana klýbynyń úshinshi otyrysynyń basty taqyryby - «Úlken Eýrazııa» transformasııasy: aldaǵy onjyldyqta eýrazııalyq keńistikti qalyptastyratyn geosaıası, aımaqtyq, ekonomıkalyq jáne tehnologııalyq trendter. Astana klýbynyń otyrystary «Chatham house» erejesi boıynsha ótkiziledi. Bıylǵy jyly onyń beldi saıasatkerler men sarapshylardan turatyn qatysýshylary jahandyq úrdister men Eýrazııaǵa yqpal etip jatqan eń ózekti máseleler boıynsha sheshimder izdemek.
Astana klýby QR Tuńǵysh Prezıdenti - Elbasy qorynyń jetekshi halyqaralyq ǵylymı ortalyqtar Qytaı qazirgi zamanǵy halyqaralyq qatynastar akademııasy, Germanııa syrtqy saıasat keńesi, Reseı halyqaralyq ister keńesi jáne Halyqaralyq beıbitshilik úshin Karnegı qorymen birlesip qurǵan halyqaralyq pikirtalas alańy sanalady.
Abaı Asankeldiuly,
"Egemen Qazaqstan"
