Mereıli mereıtoı aıasynda bilim ordasy «Juldyzdy 30 kún» atty qoǵamdyq-mádenı is-sharalardy uıymdastyrýǵa muryndyq bolyp otyr. Qarasha aıynyń alǵashqy kúninen bastaý alǵan sharalar aıdyń sońyna deıin jalǵasyn tappaq. Sharanyń alǵashqy aptasy sport kúnderine arnalyp, jergilikti jáne respýblıkalyq BAQ ókilderine ýnıversıtettiń sporttyq jarystary, nátıjeleri jáne sport seksııalary tanystyryldy. Esterińizge sala keteıik, Olımpıadanyń eki dúrkin chempıony Ilıa Ilın, halyqaralyq dárejedegi ziltemirshi Almas О́teshov, boksshy Qamshybek Qońqabaev, 2016 jylǵy Rıo olımpıadasynyń qola júldegeri Aleksandr Zaıchıkov jáne ózge dańqty sportshylar Qorqyt Ata ýnıversıtetiniń túlekteri. Budan bólek, «80 jyldyqqa 80 mınýttyq jattyǵý» taqyrybynda ýnıversıtettiń professor-oqytýshylary men stýdentteriniń senbilik sergitý sáti ótti.
Elbasynyń «Rýhanı jańǵyrý: bolashaqqa baǵdar» baǵdarlamasy da ýnıversıtet sharalarynan tys qalǵan joq. Ýnıversıtettiń ǵylymı-tehnıkalyq kitaphanasynda «Rýhanı jańǵyrý – bolashaqqa senim» taqyrybynda kitaptar kórmesi ótti. Sondaı-aq, «Mádenı mura – rýhanı qundylyq» taqyrybynda «Arheologııa jáne etnografııa» ǵylymı-zertteý ortalyǵynyń jumysy ýnıversıtet stýdentteri men jergilikti BAQ ókilderine tanystyryldy. Irgeli oqý ordasynyń ardager-ustazdarymen de kezdesý uıymdastyrylyp, jastarǵa úlgi-ónege jıyny kórsetildi.
Alda akademık A.D.Taımanovtyń 100 jyldyǵyna arnalǵan «Qazirgi zamanǵy matematıka: problemalary jáne qoldanystary» atty II halyqaralyq ǵylymı Taımanov oqýlarynyń plenarlyq májilisi, ýnıversıtettiń juldyzdy túlekterimen kezdesý jáne ózge de mańyzdy is-sharalar jalǵasyn tabady.
Erjan BAITILES,
«Egemen Qazaqstan»
QYZYLORDA
