Jyl saıyn álemde mıkrobtarǵa qarsy preparattarǵa tózimdilikten 700 myńdaı adam qaıtys bolady eken, ıaǵnı syrqat janǵa qandaı antıbıotık te áser etpeı, aqyry onyń sońy ólimge aparady. Antıbıotıkterdi qalaı bolsa solaı qoldaný, dárigerdiń nusqaýynsyz shamadan tys ishý – organızmdegi mıkrobtardyń dárige tózimdiligin týǵyzady, deıdi jıynǵa qatysýshylar. Densaýlyq saqtaý mınıstrligi Qoǵamdyq densaýlyq saqtaý komıtetiniń tóraǵasy Jandarbek Bekshınniń aıtýynsha, qazir adamdar ınternet degen «dárigerden» bárin surap alady da ózin-ózi emdep júre beredi. Onyń ústine qus, mal eti arqyly da adam boıyna antıbıotıkter enip, bul da mıkrobtardyń dárilerge tózimdiligin arttyra túsedi. Sondyqtan mal emdep júrgen veterınarlar da jan-janýarlarǵa antıbıotıkterdi baıqap qoldaný kerektigin eske saldy.
Qoǵamdyq densaýlyq saqtaý komıteti Ulttyq saraptama ortalyǵynyń mamany Gúljan Maqsutovanyń málimetinshe, byltyr qus etine júrgizilgen synamada tetrasıklın tobyna jatatyn antıbıotıkter shamadan tys kóp qoldanylǵany anyqtalǵan. Al bıylǵy 9 aıdyń ishinde sút ónimderiniń tórt synamasynda levomısetın mólsheri shekti deńgeıden asyp ketken.
Antıbıotıkterdi teris paıdalaný mıkrobtarǵa tózimdilikke ákeletini óz aldyna, adamzat jaqyn arada qarapaıym ınfeksııalardy da emdeı almaıtyn jaǵdaıǵa jetýi ábden múmkin. Sondyqtan mamandar antıbıotıkterdi tek dárigerdiń nusqaýymen qabyldaýǵa keńes beredi. Ári antıbıotıkpen emdeý kýrsyn ýaqytynan buryn toqtatý da mıkroorganızmderdiń oǵan degen turaqtylyǵyn arttyrady. Sol sebepti syrqat adam ózin jaqsy sezinse de, antıbıotıkterdi kemi 5-7 kún qabyldap, aǵzadaǵy ınfeksııa qozdyrǵyshtar joıylǵansha dárini úzbeý kerek.
Qymbat TOQTAMURAT,
«Egemen Qazaqstan»
