Tabıǵat apatynan shekaradan 15 shaqyrym qashyqtyqta ornalasqan Sarpol-e Zahab qalasynyń turǵyndary japa shekti. Jergilikti bılik opat bolǵandar sany áli de artýy múmkin degen boljam jasap otyr. Sebebi, qutqarýshylar toby áli birneshe eldi mekenge baryp úlgermegen.
Bul mańaıda turǵyn úılerdiń basym bóligi saz balshyqtan salynǵandyqtan qýatty apattarǵa shydas bermeıdi. Irannyń seısmologııalyq ortalyǵy dúmpý 180 ret júrip ótkenin, aldaǵy ýaqytta áli de qaıtalanýy múmkin ekenin habarlady.
Sarpol-e Zahab qalasyndaǵy ortalyq aýrýhananyń ǵımaratyna aıtarlyqtaı zııan kelgen. Osynyń saldarynan jaralanǵandarǵa tıisti deńgeıde kómek kórsetý múmkin bolmaı otyr. Al IRINN telearnasy kem degende segiz eldi mekenge zııan kelgenin jetkizdi.
– Keı jerlerde elektr energııasy úzildi, sondaı-aq telekommýnıkasııalyq júıege zııan tıdi. Bul elimizde bolǵan eń iri apattardyń biri. Qazirgi ýaqytta 70 myńnan astam turǵyn baspanasyz qaldy, – dedi Dúnıejúzilik Qyzyl Jarty aı jáne Qyzyl Kresti Iran bóliminiń basshysy Morteza Salım.
Al Irannyń qutqarý qyzmetiniń basshysy Pır-Hosseın Kýlıvand qutqarýshylar tobynyń jumysyna kóshkin kedergi keltirip otyrǵanyn málimdedi.
– Otbasymyzben otyryp keshki asymyzdy ishpek bolǵan edik. Kenetten úıimizdegi zattar «bılep» ketkendeı boldy. Alǵashynda qýatty bomba jaryldy degen oıda boldym. Biraq bári «jer silkindi» dep aıqaılaýmen boldy, – dedi Baǵdad qalasynyń turǵyny Madjıda Amır.
Jer silkinisiniń magnıtýdasy 7,3 baldy quraıdy. Al oshaǵy 33,9 km tereńdikte ornalasqan. Jer asty dúmpýi Túrkııada, Izraılde, Kýveıtte sezilgen.
Irakta jer silkinisinen ásirese Darbandıhan qalasy zardap shekti. Ol Kúrd avtonomııalyq aımaǵyndaǵy Súleımanııa qalasynan 75 shaqyrym qashyqtyqta ornalasqan. О́ńirdiń densaýlyq saqtaý mınıstri Rekaýt Hama Rashıdtiń aıtýynsha bul jaqta da jaǵdaı óte qıyn. Munda 6 turǵyn qaza bolyp, 50-den astamy túrli jaraqat alǵan.
Aıta keteıik, seısmıkalyq aımaqta ornalasqandyqtan Iranda jer silkinisi jıi bolyp turady. 2003 jyly magnıtýdasy 6,6 baldy quraıtyn apattan 26 myńǵa jýyq adam opat bolyp, eldiń ońtústik-shyǵysyndaǵy tarıhı Bam qalasy ishinara qıraǵan.
Aıan ÁBDÝÁLI,
«Egemen Qazaqstan»
