Ol ishki naryqqa ákelinetin jáne aınalymdaǵy sanıtarııalyq-epıdemıologııalyq qadaǵalaýǵa jatatyn ónimderdi baqylaý, sonymen birge tamaq ónimderiniń kóterme jáne bólshek saýdasy obektilerine qoıylatyn sanıtarlyq qaǵıdalar talaptaryn qaıta qaraý boıynsha júrgizilgen jumys týraly áńgimeledi.
Respýblıka boıynsha otandyq ónimderdiń 12 paıyzy tehnıkalyq reglamentter talaptaryna sáıkes kelmeıtin tamaq ónimderiniń 88 paıyzy ımporttyq ónimder úlesine tıesili ekenin atap ótti. Tehnıkalyq reglamentter talaptarynyń negizgi buzýshylyqtary qaýipsizdik talaptaryna sáıkes kelmeý boıynsha – 36 paıyz, fızıkalyq-hımııalyq kórsetkishterge sáıkes kelmeýi – 12 paıyz, óndirýshilerdiń tańbalaý qaǵıdalaryn buzýy 48 paıyzdy quraıdy.
Qoǵamdyq densaýlyq saqtaý komıteti tóraǵasynyń sózinshe, janýarlar tinderin sáıkestendirýdi anyqtaý boıynsha tamaq ónimderiniń 145 úlgisi alynǵan. 40 úlgide ónimniń tańbalaýynda kórsetilmegen shoshqa DNQ-sy anyqtalǵan. «Et ónimi toptary boıynsha shujyq buıymdarynyń 67,5 paıyz synamasynda, jartylaı fabrıkattardyń 20,0 paıyz synamasynda jáne et konservileriniń 7,5 paıyz synamasynda sáıkessizdik anyqtaldy», dedi ol.
Jandarbek Bekshınniń málimetinshe, sáıkes kelmeıtin tamaq ónimderiniń basym segmenti Reseı Federasııasy óndirýshileriniń úlesinde (52 paıyz).
«Bul sút ónimderi, balyq jáne et konservileri, shujyq jáne kondıterlik ónimder, BAQ jáne balalar taǵamy óndirýshileri. Sonymen qatar Qyrǵyz Respýblıkasynyń sáıkes kelmeıtin ónimderiniń 4 paıyzdan 9,6 paıyzǵa deıin ósýi baıqalady. Qyrǵyzstandyq óndirýshilerdiń sút ónimderi men kondıterlik buıymdarynyń birqatarynyń tehnıkalyq reglamentter talaptaryn júıeli túrde buzý faktileri baıqalýda. Mysaly, 2016 jyly komıtet mıkrobıologııalyq kórsetkishter boıynsha «Aq-sút» AAQ sharýa maıy sút ónimin, maı-qyshqyl quramy boıynsha «Vımm Bıl Damm» AAQ sútin, jalǵandyǵy boıynsha «Kýlıkovskıı» KD kondıterlik ónimderin ákelýge ýaqytsha shekteý engizdi. Tek qazan aıynda ǵana qyrǵyzstandyq óndirýshilerdiń sáıkes kelmeıtin tamaq ónimderiniń úlesi – 23,4, al jeńil ónerkásip taýarlary 44 paıyzdy qurady, bul árbir 2-3-shi synama», dep atap ótti ol.
J.Bekshınniń aıtýynsha, aǵymdaǵy jyly anyqtalǵan faktiler negizinde ónimderdi satyp alý qorytyndysy boıynsha buzýshylyqty joıý týraly 801 nusqama berilgen, ákimshilik quqyq buzýshylyqtar týraly 826 is qozǵalǵan, sottyń 415 qaýlysy shyǵarylǵan, onyń ishinde 360 talap aryz qanaǵattandyrylyp, jalpy somasy 19,5 mln teńgeden astam aıyppul salynǵan. Sonymen qatar saýda kásiporyndarynda 11,2 mln teńgeden astam somaǵa sáıkes kelmeıtin ónimniń 172 tonnasy saýdadan alynǵan.
Raýan QAIDAR,
«Egemen Qazaqstan»
