Erkin kúresten Atlanta olımpıadasynyń qola júldegeri Máýlen Mamyrov, grek-rım kúresinen Beıjiń olımpıadasynyń kúmis júldegeri Nurbaqyt Teńizbaev, erkin kúresten London olımpıadasynyń qola júldegeri Aqjúrek Tańatarov, Rıo Olımpıadasynyń qola júldegeri Elmıra Syzdyqova, grek-rım kúresinen Álem chempıonatynyń kúmis júldegeri Demeý Jadraev, Azııa chempıony Erbol Qońyratov, erkin kúresten 1976 jylǵy Monreal olımpıadasynyń kúmis júldegeri Aleksandr Ivanov 200-ge tarta balǵyn balýandarǵa kúrestiń aıla-tásilderin túsindirdi. Sharany uıymdastyrǵa uıtqy bolǵan №15 balalar men jasóspirimder sport mektebiniń dırektory Dastan Qanathanovtyń aıtýynsha, mundaı sheberlik sabaǵyn ótkizýdegi maqsat jas balýandardyń sheberligin shyńdaı túsedi.
- Qazirgi tańda Almatydaǵy «Halyq Arena», «Almaty Arena», «Dostyq» sport keshenderinde jas balýandardyń kúrespen shuǵyldanýyna keremet jaǵdaı jasalǵan. Sporttyq jekpe-jek jáne kúsh qoldanylatyn sport túrleri Konfederasııasy men QR grek-rım, erkin jáne áıelder kúresi federasııasynyń qoldaýynyń arqasynda jas balýandarymyz atalǵan sport keshenderinde tegin jattyǵady. Búgingi ótkizip otyrǵan sporttyq sharada jas balýandarymyz Olımpıada men álem chempıonatynyń júldegerlerinen kúrestiń aıla-tásilin úırenip, sheberlikterin shyńdaı túsetinine senimim zor. Bolashaqta olar da aǵalary sııaqty el namysyn abyroımen qorǵap, kók týymyzdy kókte jelbiretetini sózsiz, - dedi D.Qanathanov.
Sheberlik sabaǵynyń ashylý saltanatynda jas balýandar ataqty balýandarmen qatar turyp, Qazaqstan Respýblıkasynyń ánuranyn tyńdady. Artynsha, kezek-kezegimen kilemge shyǵyp, ár balýan ózderiniń súıikti ádis-tásilderiniń qyr-syryn kórsetti.
Sporttyq sharanyń sońynda jas balýandar ataqty balýandardan qoltańba alyp, estelik sýretke tústi.
Budan keıin QR grek-rım, erkin jáne áıelder kúresi federasııasynyń tóreshiler korpýsy jáne bapkerler shtabynyń jumysy jónindegi vıse-prezıdenti Erlan Sádýaqasuly Qojasbaı sheberlik sabaǵyna qatysqan balýandardy «Merkýrıı Medet» sporttyq-saýyqtyrý kesheninde ornalasqan Kúres Akademııasyna bastap bardy. Ol jerde balýandar Akademııanyń tynys-tirshiligimen tanysty. Erkin kúresten Atlanta olımpıadasynyń qola júldegeri Máýlen Mamyrov Akademııa qabyrǵasynda tálim alyp jatqan jas balýandarǵa batasyn berip, aqjol tiledi.
Erkebulan Aldabergen
