Eljan Birtanovtyń aıtýynsha, densaýlyq saqtaý salasyn sıfrlandyrý Prezıdenttiń «Qazaqstannyń úshinshi jańǵyrýy: jahandyq básekege qabilettilik» Joldaýyn iske asyrý aıasynda «Densaýlyq saqtaý júıesin jańǵyrtý» jobasy boıynsha jeke bastama retinde iske asyrylýda, sonymen qatar «Sıfrlyq Qazaqstan» memlekettik baǵdarlamasymen tolyq sáıkestendirilgen.
Densaýlyq saqtaý júıesin sıfrlandyrýdyń 2017–2018 jyldarǵa arnalǵan jol kartasy ázirlendi. Jyl sońyna deıin Biryńǵaı ıntegrasııalyq platformany pılottyq engizý kózdelgen, onyń aıasynda Qazaqstan Respýblıkasynyń árbir azamatynyń jeke uıashyǵy — densaýlyǵynyń elektrondy pasporty bolady. Sondaı-aq, jekelegen qyzmetterdiń jumysy avtomattandyrylady: Medısınalyq saqtandyrý qory, qoǵamdyq densaýlyq saqtaý men dári-dármekpen qamtamasyz etý salasy.
«Densaýlyq saqtaý mınıstrligi men IBM kompanııasynyń arasynda yntymaqtastyq týraly memorandýmǵa qol qoıyldy, onyń sheńberinde «Watson for oncology» — densaýlyq saqtaý salasyna jasandy ıntellektini pılottyq engizý josparlanǵan. Qazirgi tańda joǵaryda atalǵan memorandým aıasynda pılottyq jobany ótkizý boıynsha jol kartasy ázirlenýde», — dedi mınıstr.
Sonymen qatar búginde IýNISEF-pen birlesip «Patronaj meıirbıkesi jáne erte jastaǵy balalardy kútý» mobıldi qosymshasyn ázirleý jumystary júrgizilýde. Mobıldi qosymshany iske qosý 2017 jyldyń jeltoqsan aıyna josparlanǵan.
2018 jyly qaǵazsyz densaýlyq saqtaý júıesi pılottyq rejımde tórt óńirde: Qaraǵandy, Qostanaı, Aqmola jáne Batys Qazaqstan oblystarynda, sondaı-aq, respýblıkalyq deńgeıdegi birqatar uıymda iske qosylady. 2019 jyldyń 1 qańtarynan bastap medısına uıymdary medısınalyq qujattamany qaǵazsyz formatta júrgizýge tolyqtaı kóshedi, sonyń ishinde: elektrondyq ambýlatorııalyq kartalar, aýrýlardyń elektrondyq tarıhy jáne elektrondyq reseptilerdiń kóshirmesi.
Mınıstrdiń aıtýynsha, densaýlyq saqtaý salasyn sıfrlandyrý arqyly medısına qyzmetkerleriniń eńbek ónimdiligin ulǵaıtyp, halyqtyń medısınalyq qyzmetterge qanaǵattaný deńgeıin arttyrý kózdelgen.
