Alda ótetin qysqy Olımpıada oıyndarynda álemniń 80-nen astam elinen 5000-nan astam sportshy men resmı tulǵa qatysady dep josparlanǵan. 15 sport túri boıynsha 102 medal jıyntyǵy oınatylatyn bolady. Qazaqstandyq sport delegasııasy 9 sport túrine qatysýdy josparlap otyr: bıatlon, mánerlep syrǵanaý, taý shańǵy sporty, short-trek, konkımen júgirý sporty, shana sporty, shańǵy jarysy, shańǵymen tramplınnen sekirý, frıstaıl (akrobatıka, mogýl).
Qazirgi tańda Qazaqstanda eki sport túri boıynsha 13 lısenzııa bar (bıatlon — 10, mánerlep syrǵanaý — 3). 2017-2018 maýsymda lısenzııaǵa ıe bolý úshin qysqy sport túrleri boıynsha Qazaqstannyń qurama komandasy halyqaralyq sporttyq kúntizbege sáıkes halyqaralyq biliktilik jarystaryna qatysady.
«Elimizdiń Olımpıada quramasyn qalyptastyrý atletterdiń dene daıyndyǵynyń deńgeıin, psıhologııalyq turaqtylyǵyn eskere otyryp, qorytyndy irikteý kezeńi men dopıngke qarsy baqylaý nátıjeleri boıynsha kelesi jyldyń qańtaryna deıin jalǵasady», — dep atap ótti A. Muhamedıuly.
Baqytjan Saǵyntaev mádenıet jáne sport mınıstrliginiń basshylyǵyna qalǵan kúnderi qysqy Olımpıada oıyndaryna daıyndyqty sapaly júrgizýdi tapsyrdy.
