Mundaı jaǵymdy jańalyqty búgin О́skemende aqparattyq ortalyqta ótken brıfıngte Kókpekti aýdanynyń ákimi Ramıl Saǵandyqov jetkizdi. Omby jerinde dúnıe esigin ashqan alashtyń arda uly 1920 jyly Kókpekti aýylynyń mańynda qyzyldardyń qolynan mezgilsiz qaza tapqany belgili.
Belgili aıtysker aqyn, zertteýshi Qalıhan Altynbaev óziniń «Kókpekti» atty kitabynda Hamıt Toqtamyshev atylǵannan keıin kókpektilik aqsaqaldar «musylmansha jerleımiz» dep qyzyldardan onyń denesin surap alyp, jýyndyryp, áskerı kıimimen birge Dáýit haziret degen kisiniń aıaǵyna jerlegenin jazǵan-dy.
Jýyrda búginde Ulan aýdanynyń Aıyrtaý aýylynda turatyn sport ardageri Muqan Aǵzamovpen kezdesip qalyp, sózden sóz shyǵyp, aıtysker aqyn jazyp otyrǵan Dáýit hazirettiń ol kisiniń tórtinshi atasy ekenin estip, alash áskeriniń jetekshisine qatysty bir derektiń ushyǵynyń shyqqanyna qýanǵan edik. Dáýit haziret kezinde Kókpekti okrýginiń (ol ýaqytta okrýgke Jańa Semeıden bastap, Kúrshimge deıingi aýmaqtyń bári qaraǵan) ımamy qyzmetin atqaryp, 1910 jyly dúnıeden ótipti. Muqan Aǵzamov babasynyń basyna bıyl 19 mamyrda eskertkish taqta qoıdyrypty. Tórtinshi atasynyń beıitindegi eski arab tilimen tasqa jazylǵan jazýdy eshkim oqı almaǵan soń tájiktiń moldasyn ákelip oqytypty.
«Kókpekti aýylynyń irgesindegi eski beıitterdi osydan onshaqty jyl buryn Rámzı Bespaev degen sol kezdegi aýdan ákimi qorshatypty. Shamamen jarty gektardaı aýmaqty alyp jatyr. Qaýlap qalyń shóp ósip ketken. Qaı jerde beıit baryn anyqtaý da qıyn. Qalıhan Altynbaev jazbasyna súıene otyryp Hamıt Toqtamyshevtiń jatqan jerin qorshap, basyna belgi qoıylǵany jón-aq. Osy isti jedeldetip qolǵa alǵanymyz lázim», - deıdi sport ardageri.
Azamat QASYM,
«Egemen Qazaqstan»
