Oǵan qala basshylyǵy, zııaly qaýym ókilderi, stýdentter men jastar tulǵanyń jaqyndary qatysyp, arnaıy jasaqtalǵan turaqty ekspozısııanyń ashylýyn tamashalady. Oral Baıǵonysulynyń jeke zattarynyń ishinde Parlamentte jáne ár jyldary túsken foto sýretteri, paıdalanylǵan kitaptary, eki qalamsaby erekshe nazar aýdarady.
«Elimiz Táýelsizdiginiń eleń-alańynan bastap, Qazaqstan Respýblıkasy Prezıdenti Ákimshiliginiń uıymdastyrý-baqylaý jáne kadr saıasaty basqarmasynyń Memlekettik ınspektory, Parlament Májilisi tóraǵasynyń orynbasary, Parlament Májilisi tóraǵasy bolyp, memlekettik jaýapty qyzmetter atqarǵan Oral Baıǵonysuly Qazaqstandaǵy basqarý jáne zań shyǵarý isine mol úles qosty. Ol kisiniń adamgershilik tulǵasy da jastarǵa úlgi bolyp qala beredi» dedi Arqalyq qalasynyń ákimi Amantaı Balǵarın.
Saltanatqa jınalǵandarǵa Oral Muhametjanovtyń dosy Hamıtbek Mahmutuly iri memleket qaıratkeri týraly estelikter, jubaıy Sholpan, uly Erkin Oraluly ónegeli isti óskeleń urpaqqa úlgi etken el azamattaryna alǵys aıtty.
Oral Muhametjanovqa arnalǵan shara Arqalyqtaǵy Y.Altynsarın atyndaǵy memlekettik pedagogıkalyq ınstıtýtta jalǵasyp, «Elin súıgen azamat» atty eske alý keshi ótti. Onda Qala ákiminiń orynbasary Túbekbaı Áýbákirov sóz sóılep, qalalyq máslıhattyń hatshysy Gúlbaný Eltebaeva birtýar tulǵanyń ómiri men qyzmeti jaıly baıandama jasady. Eńbek ardagerleri Serikbaı Tapaev, Qaıyrden Jıenbaev, QR Mádenıet qaıratkeri Jumaǵalı О́mirbek, Qarataı Nurmanovtar estelikterin aıtty.
Eline tutqa bolǵan asyl perzenttiń 70 jyldyq mereıtoıy qarsańynda qalalyq bilim bóliminiń uıytqy bolýymen ótkizilgen mektepshilik «Oral Muhamedjanov – memleket qaıratkeri» taqyrybyndaǵy shyǵarmashylyq jumystar (shyǵarma, referat) baıqaýynyń jeńimpazdary marapattaldy.
Názıra Járimbet
«Egemen Qazaqstan»
Qostanaı
