Sodan beri joldyń bul bóligine kúrdeli jóndeý jumystary júrgizilmepti. Osynyń saldarynan qazirgi jaı-kúıi óte múshkil deýge bolady.
«Nurly jol» baǵdarlamasy boıynsha bastalǵan ınnovasııalyq mańyzy joǵary jobanyń aýqymyn tek bir ǵana Aqtóbe – Atyraý aralyǵymen shekteı salýǵa bolmaıdy. Bul avtojol qurylysy Reseıdiń ońtústik bóliginde ornalasqan Astrahan qalasyn jalǵaıtyn magıstralǵa baryp qosylmaq. Budan ári Ortalyq Azııa men Parsy shyǵanaǵy elderine shyǵýǵa da jańa múmkindikter ashylady. Sonymen birge «Nurly jol» arqyly belgilengen joba aglomerasııalyq aımaqtan Mańǵystaý baǵytyna deıingi avtojoldy da jalǵastyra alady.
«Iri memleketter arasyndaǵy ózara ekonomıkalyq yntymaqtastyq pen qarym-qatynastar turǵysynan qarastyrǵanda, atalǵan aýqymdy qurylys Qazaqstannyń Qytaımen, Reseımen jáne Batys Eýropa elderimen arasyndaǵy taýar tranzıtiniń kólemin 2-3 ese ósirýge múmkindik beredi», dep málimdedi Investısııalar jáne damý mınıstrligi Avtomobıl joldary komıtetiniń tóraǵasy Mereke Pishembaev. «Buǵan qosa, atalǵan jobanyń áleýmettik-turmystyq baılanystar men qarym-qatynastar máselesindegi orny da aıryqsha. Iаǵnı jóndelgen jol jolaýshylar leginiń óse túsýine de qolaıly jaǵdaılar týǵyzady», dedi ol odan ári.
«Nurly jol» baǵdarlamasynyń shapaǵaty aımaqtardaǵy jergilikti kásipkerlik pen shaǵyn jáne ortasha bıznesti damytýǵa da tıetini belgili bolyp otyr. Bir sózben aıtqanda, óńirler arqyly ótetin joldardyń damýy men qurylysy jergilikti azamattarǵa kempıng, avtoservıs jáne ózge de demalý men tamaqtandyrý oryndaryn salyp, tabys tabýǵa múmkindik beredi. Atalǵan avtomobıl jolyna kúrdeli jóndeý júrgizý barysynda 2000-nan astam adam jańa jumys oryndaryna tartylady dep kútilýde. Olardyń 90 paıyzyn jergilikti turǵyndar quramaq. Qurylys jumystaryna Túrkııa, Ázerbaıjan jáne Italııa elderiniń kompanııalary qatyspaq.
Investısııalar jáne damý mınıstrligi Avtomobıl joldary komıtetiniń derekterine súıensek, alǵashqy kezektegi «Aqtóbe – Atyraý» jol bóligin qaıta qalpyna keltirýge Azııa damý banki, Islam damý banki sekildi halyqaralyq qarjy ınstıtýttarynyń qarajattary tartylmaq. Onyń jalpy somasy 147 mıllıard teńgeni quraıdy. Taǵy bir jaǵymdy jaıt, joǵaryda atalǵan elderdiń kompanııalary óńirdegi atqarýshy bılikpen jasalǵan ózara kelisimderge sáıkes qurylys pen qalpyna keltirý jumystaryna jergilikti qurylys ındýstrııasynyń materıaldary men eńbek resýrstaryn paıdalanbaq. Bul bıýdjetke túsetin qosymsha salymdar men jańa jumys oryndary kóbeıedi degen sóz.
Atalǵan jobanyń belgilengen keste men merzimge saı oryndalýyn baqylaý júıesi da qosa oılastyrylǵan. Qurylys sapasyn qadaǵalaý isi de osy qatarda tur. Bul mindet «QazAvtoJol» UK» AQ men koreıalyq «Donsýng» kompanııasynyń enshisine tıip otyr. Kúrdeli qurylys pen qalpyna keltirý jumystary 2020 jylǵa deıin aıaqtalýǵa tıis.
Temir QUSAIYN,
«Egemen Qazaqstan»
AQTО́BE
