Biregeı bilim oshaǵynyń basshysy Salamat Izbastınanyń aıtýynsha, ótken jyly 26 oqýshy altyn uıamen qoshtasty. Sonyń 19-y grantqa tústi. Jylda «Altyn belgi» jáne «Úzdik attestat» ıegerleri UBT-da bilimderin dáleldep júr. Bıyl «Altyn belgige» 4 úmitker bar.
Mektepte barlyǵy 27 úıirme jumys isteıdi. Onyń ishinde «Art-stýdııasy», «Áýen», «Boztorǵaı», «Jas daryn», «Teatr», «Sheber qoldar», «Nazerke» bı ansambli men «Aqjeleń» dombyra úıirmesi bilim oshaǵynyń abyroıyn arttyryp júr. 2015-2016 jyldary G.Aqsholaqova jetekshilik etetin «Nazerke» dombyra ansambli halyqaralyq «Erligi – elge mura» baıqaýynda bas júldeni oljalady, 2 oqýshy 1-oryndy enshiledi. Osy jyly I.Smaǵulova jetekshilik etetin «Naz» ansambli «Solo» atalymynda bas júldeni, orta top 1-oryndy, joǵary top II oryndy ıelendi. Jýyrda kórkemsýret mektebiniń bólimshesi ashylady.
Gımnazııanyń negizin qalaýshy Láıla Syrymbetova bilim ordasymen baılanysyn úzgen joq. Búginde Astanadaǵy Ybyraı Altynsarın atyndaǵy Ulttyq bilim akademııasynda 3 tilde bilim beretin bólimdi basqarady. Byltyrdan bastap Láıla Syrymbetova atyndaǵy pán olımpıadasy dástúrli túrde ótkizile bastady.
«Gımnazııanyń jumysy «Qyzdar álippesi» avtorlyq baǵdarlamasy men «Qyzdar álippesi» hrestomatııasyna negizdelgen. Bilim berýden bólek, osy baǵdarlama qyzdardyń keleshekte otbasynyń uıytqysy bolýyna áser etti me? Sizder statıstıkalyq zertteýler júrgizip kórdińizder me degen saýalymyzǵa Salamat Dáýitqyzy: «Qazaq qyzdar gımnazııasynyń basty ıdeıasy – «Jurtyńdy qorǵaımyn deseń, ulyńdy tárbıele, ultyńdy qorǵaımyn deseń, qyzyńdy tárbıele». Mektepte oqý-tárbıe jumysynyń tujyrymdamasy, mektep túlegi men qazaq qyzdar gımnazııasy muǵaliminiń modeli jasaldy, olardy jyl saıyn ata-analar qoǵamy áleýmettik suranysqa saı tolyqtyryp, túzetip otyrady. Bul baǵdarlamanyń maqsaty – ulttyq rýhanı baılyqty jalpyadamzattyq mádenıetpen ushtastyra baılanystyrý arqyly qazaq qyzdaryn tárbıeleý jáne oqytý. Baǵdarlama aıasynda barlyq oqý pánderi qamtylǵan jáne synyptan tys jumystar engizilgen. Statıstıka demekshi, gımnazııanyń 20 jyldyǵy qarsańynda osy aralyqta bilim alǵan 2 myńnan astam túlektiń qazirgi jaǵdaıymen synyp jetekshileri arqyly tanystyq. Zertteýdiń nátıjesinde gımnazııada tárbıelengen qyzdardyń 90 paıyzy óz otbasylarynyń uıytqysy bolyp otyrǵanyna kóz jetkizdik. Iаǵnı biren-sarany bolmasa jalǵyzbasty, ajyrasqan analar joqtyń qasy», dep jaýap berdi. Ári qaraı áńgimesin sabaqtaǵan ol: 2008 jyly bizge ǵımarattyń 200 balaǵa laıyqtalǵan ekinshi qanaty bólindi. Biz 183 balamen kóship keldik. 20 jylda bala sany eki ese ósti. Búginde 403 bala bilim alýda. Sonyń saldarynan eki aýysymda jumys istep jatyrmyz. Ata-analar tarapynan narazylyq bildirýshiler kóp. Osy másele sheshimin tapsa eken deımiz», dep túıini sheshilmeı turǵan máseleni de aıtty.
«Oıdy oı qozǵaıdy» demekshi, demografııalyq ósimge baılanysty búginde qazaq mektepterine degen suranystyń ósip kele jatqandyǵyn ýaqyt kórsetip otyr. Keıbir qazaq mektepteri eki aýysymda jumys isteýge májbúr. Ekinshi aýysymda oqý nemese tústen keıin eńbektený muǵalimge de, oqýshyǵa da qolaısyzdyq týdyrady. Osyndaıda balalary ekinshi aýysymda oqıtyn ata-analardyń ókpe-renishine túsinistikpen qaraý kerek.
Áıtse de biz túsinbeıtin bir jaı – qazaq mektepterinde bala sanynyń kóptigine qaramastan, keıbir memlekettik mekemelerdi bilim ordasynyń oshaǵyna kóshirý qandaı qajettilikten týdy eken dep oılaısyń. Máselen, №18 mekteptiń bir qanatynda qalalyq arhıv, №2 mektepte pedagogıkalyq-psıhologııalyq medısınalyq ortalyq, №36 lıseı-mektebinde qazaq-túrik lıseıi ornalasqan. Al №25 qyzdar gımnazııasynyń kúıi joǵarydaǵydaı. Bul gımnazııa ujymy men oqýshylar ógeı balanyń kúıin keship, ashanany, sportzaldy, medpýnktti №24 mekteppen birge paıdalanyp otyr. Onyń ózinde basymdyq – ǵımarat ıesi №24 mektepke beriledi.
Bilim ordasy balalarǵa ǵana qyzmet kórsetýi tıis degen oıdamyz.
Darııa ERǴAZINA,
jýrnalıst
Pavlodar oblysy,
Ekibastuz qalasy
