«Qazaqstannyń geografııalyq ornalasýy men kólik ınfraqurylymy aıyna jańa túsimniń 1,5 mln tonnasyn tasymaldaý kólemin qamtamasyz etýge múmkindik beredi. Bul 1 mln tonna astyq pen 300 myń tonna undy quraıdy», deıdi O.Qulaqov. Onyń málimetinshe, túsimniń jaqsy sapalyq jáne sandyq kórsetkishteri astyq pen un eksporty qurylymynyń ózgerýine yqpal etken. Italııa, Túrkııa, Iran, Aýǵanstan tárizdi alys elderge eksport artqan. Bul óz kezeginde alysqa tasymaldaýdyń artýyna jáne astyq tasymaly tutynýshylyq parki men jabyq vagondardyń kóbeıýine sebepshi bolypty. «QTJ – Júk tasymaly» AQ-nyń basshysy elimizde astyqty konteınermen eksportqa shyǵarý jolǵa qoıylatynyn málimdedi.
«Biz astyq tasymaldaýdyń jańa tehnologııalaryn engizý baǵytynda da jumys júrgizýdemiz. Máselen, qazan aıynda «Quryq-Alıat-Ahalkalakı-Kars-Mersın» jańa baǵytynda konteınermen astyq tasymaldaýdyń biregeı jobasyn júzege asyrdyq. Keleshekte bul baǵytta aı saıyn 10 myń tonnaǵa deıin astyq tasymaldaý josparlanýda», dedi O.Qulaqov. Negizi, Qazaqstan unynyń aýqymdy bóligi Aýǵanstanǵa jóneltiledi. Ol baǵyttaǵy logıstıka jetkizý jyldamdyǵynyń óte tómendigimen jáne Aýǵanstannyń Haıraton, Akın jáne Týrgýndı qabyldaý stansalaryndaǵy júkti túsirý múmkindiginiń álsizdigimen sıpattalady. Sebebi aýǵan tarapynda vagondaǵy júkti túsirý avtomattandyrylmaǵan eken. Júk túsiretin stansalarda taýarlar irkilisi jıi oryn alatyn kórinedi.
Oralhan Raıhanuly Kaspıı arqyly tasymal áleýetiniń barynsha joǵary ósimin qamtamasyz etý úshin port ınfraqurylymyn damytý qolǵa alynyp jatqanyna toqtaldy. «Aqtaý portyn soltústikke qaraı keńeıtý jobasy aıaqtaldy. Quryq portynda temir jol jáne parom kesheni paıdalanýǵa berildi jáne kelesi jyldyń basynda onyń ekinshi fazasy logıstıkalyq ınfraqurylymy men kedendik qyzmet kórsetý aımaǵy bar avtomobıldik parom kesheniniń qurylysy aıaqtalatyn bolady», dedi ol. Kompanııa basshysynyń aıtýynsha, tıisti sharýalar atqarylǵan soń astyq tasymaly kelesi jyly 26 mıllıon tonnaǵa deıin artatyn bolady. Sonymen qatar menshikti qurǵaq júk tasıtyn paromdy flot qurylyp, bes jyldyń ishinde kemeler sany jıyrmaǵa jetpek.
Ashat RAIQUL,
«Egemen Qazaqstan»
