Kóshpeli otyrys aıasynda Áskerı doktrınany, Qazaqstan Respýblıkasy Qarýly Kúshteriniń, basqa da áskerı quralymdarynyń qurylysy men damý jospary tujyrymdamasyn júzege asyrý máseleleri talqylandy.
Sharaǵa Senat depýtattary, elimizdiń Qorǵanys mınıstrliginiń, Ulttyq qaýipsizdik komıteti Shekara qyzmetiniń, IIM Ulttyq ulannyń basshylyǵy qatysty.
Kezdesýdi ashqan D.Nazarbaeva eldiń qorǵanys qabiletin jáne qaýipsizdigin qamtamasyz etý máseleleriniń mańyzdylyǵyn atap ótti. «Qarýly kúshter – bizdiń halqymyzdyń táýelsizdigine kepildik beredi», dedi syrtqy qaýipterdi boldyrmaý men joıýda armııa róliniń artyp kele jatqanyn atap ótken senator.
Otyrysta elimizdiń Qarýly Kúshteri Bas shtaby bastyǵynyń birinshi orynbasary, general-maıor Rýslan Shpekbaevtyń Áskerı doktrına týraly baıandamasy tyńdaldy. Ol doktrınada kúrestiń «gıbrıdti» ádisteri, «áskerı emes quraldar», «ishki qarýly qaqtyǵys» degen uǵymdar men anyqtamalardyń birinshi ret jasalyp qoldanylǵanyn, QR Qarýly Kúshteriniń, basqa da áskerler men áskerı quralymdardy qoldaný, kıber qaýipsizdik sharalaryn kúsheıtý, jalpy áskerı qaýipsizdikti qamtamasyz etý júıesine aýmaqtyq qorǵanysty ıntegrasııalaý, materıaldyq-tehnıkalyq qamtamasyz etý júıesin damytý, Qazaqstannyń beıbitshilikti qoldaý sharalaryna qatysýyn keńeıtý, memlekettiń áskerı uıymdardy basqarý júıesin damytý tártibi naqtylandy dep atap ótti.
«Bizdiń birlesken jan-jaqty jumysymyz armııany qajetti, zamanaýı qarý-jaraqpen, áskerı tehnıkamen jaqyn arada jabdyqtaý máselelerin sheshýge múmkindik beredi. Ol úshin «Qorǵanys týraly» zańǵa tıisti túzetýler engizý qajet jáne bul múddeli memlekettik organdarmen jumys jasaýdy talap etedi», dep atap ótti Halyqaralyq qatynastar, qorǵanys jáne qaýipsizdik komıtetiniń tóraǵasy Darıǵa Nazarbaeva.
