Ortalyq mýzeıdiń sońǵy on bes jyl ishinde júrgizgen keshendi sharalarynyń biri – álemniń túrli elderimen mádenıet salasynda halyqaralyq baılanysty nasıhattaý. Mýzeıde Qazaqstanda tirkelgen shet memleket elshilikteri jáne konsýldyqtarymen birlese túrli taqyryptyq kórmeler, is-sharalar uıymdastyryp turý dástúrge aınalǵan. Solardyń biri – kórermender nazaryna usynylyp otyrǵan «Farfor ónerindegi Jibek joly jaıly Beıjiń ańyzy» dep atalǵan Qytaı zamanaýı beıneleý óneri kórmesi.
Myńdaǵan jyldar boıy qytaı halqy farfor buıymdaryn óz memleketiniń atynan dostasqan elderine, dıplomattarǵa tabystap, belgili adamdarǵa qundy káde retinde syıǵa tartyp keledi. Osyndaı baılanystar arqyly Qytaıdyń ózge eldermen qarym-qatynasy nyǵaıyp, túrli ulttardyń dostyǵy tereńdep, qytaı mádenıeti álemge taraldy. Munyń ózindik sebebi bar. Ejelden-aq álemge tanymal bolǵan farfor qytaıdyń dástúrli mádenıetiniń bir bóligi sanalǵan. Arab tilinen aýdarǵanda «farforly zat» sóziniń máni «qytaılyq», «Qytaıdan» degen uǵymdy bildirse kerek.
– Bul kóshpeli kórme jumysyndaǵy jádigerler men buıymdardyń barlyǵy Beıjiń qalasynan ákelingen. Beıjiń Uly Jibek jolynyń bastaýy, óner men mádenıettiń shoǵyrlanǵan oshaǵy. Mundaǵy týyndylar halqymyzdyń sýret óneriniń erekshelikterin, el astanasyndaǵy aıtýly ǵımarattardyń tereń tarıhyn tanytady. Taǵdyrdyń ózi shektese ómir súrip, kórshilik baılanysta bolýdy jazǵan qazaq pen qytaı halqynyń sonaý kóne zamandar qoınaýynan bastaý alatyn tarıhı dostyq qarym-qatynasy búginde qarqyndy damyp keledi. Bul bastamanyń Qazaqstannan bastaý alýy da irgeles jatqan eki eldiń arasyndaǵy tatýlyq pen dostyqty bildiredi, – deıdi Almatyǵa arnaıy kelgen Qytaı sýretshiler qaýymdastyǵynyń múshesi, tanymal sýretshi Chen Maochan.
Eske salsaq, Qytaı eliniń kóshpeli kórme jumysy Azııa elderine alǵash shyǵarylyp otyrǵan kórinedi. Bul jobanyń bizdiń elimizden bastalǵany kóńil qýantady. Uly Jibek joly shektes elderdiń ózara qarym-qatynasynyń damýyna jol ashatyn kóshpeli kórme Almaty jurtshylyǵynyń nazaryna usynylǵannan keıin kórshiles О́zbekstan men Qyrǵyzstan elderine jol tartpaq.
Arman OKTIаBR,
«Egemen Qazaqstan»
ALMATY
