Nursultan Nazarbaev Qazaqstannyń teńizge shyǵatyn joldary joq ekenin atap ótti. 1991 jyly Keńes odaǵy ydyraǵannan keıingi kezeńde joldardyń barlyǵy Reseıge baǵyttalǵan edi. «Biz eń aldymen Qytaıǵa qaraı temirjol salyp, óz saýdamyzdy keńeıttik. Biz ınfraqurylymdy qolǵa alýǵa tıis edik», - dedi ol.
Onyń sózine qaraǵanda, baǵdarlama aıasynda 2 besjyldyqta 7,5 myń shaqyrym jol salynǵan. «Birinshi besjyldyqtyń ózinde-aq Qazaqstandaǵy barlyq áýejaıdy retke keltirdik, Kaspıı teńiziniń jaǵasyna eki zamanaýı teńiz portyn saldyq. 2015 jyly QHR tóraǵasy Sı Szınpın alǵash ret bizdiń ýnıversıtetimizde «Bir beldeý - bir jol» josparyn jarııalady. Jospar men bizdiń baǵdarlama bir-birimen keremet sáıkes keldi. Árıne, biz osy joldy qoldadyq», - dedi Prezıdent. Memleket basshysy Qazaqstanǵa QHR-dan eki temirjol keletinin tilge tıek etti. Qytaı shekarasynan Eýropaǵa Qazaqstan arqyly ótetin 3 myń shaqyrym birinshi sanatty avtotrassa salyndy.
«Biz ulan-ǵaıyr dala tósin qaq jaryp ótetin temirjol magıstralin saldyq, Qytaıdan Kaspıı teńizine deıingi 1 500 shaqyrymǵa sozylǵan jol nebári eki jylda salyndy. Túrkimenstan - Iran arqyly ótetin Parsy shyǵanaǵynyń Bándár-Abbas portyna baratyn, odan Úndistanǵa shyǵa alatyn temirjoldy saldyq. Biz, mine, osyndaı sharalardy qarastyrdyq. Táýelsizdikti alǵan jyldary Qytaımen aradaǵy saýda nólge teń boldy. Qazir ol 15 mlrd dollarǵa jetti. Buryn Qytaıdan shyqqan konteınerler eshqashan Eýropaǵa jetkizilgen emes, tek ótken jyldyń ózinde konteınerlermen Qytaıdyń shyǵys provınsııalarynan Eýropaǵa 4 mln tonna júk tasymaldandy», - dedi Prezıdent.
