Basqarma basshysynyń aıtýynsha, aldaǵy jyly Ordabasy aýdany men Túrkistan qalasynda jalpy kólemi 57,2 mln tekshe metrdi quraıtyn jańa eki sý qoımasy salynatyn bolady. Sondaı-aq, oblysymyzda sý arnalaryndaǵy sý syıymdylyǵyn tómendetý maqsatynda ylǵaldandyrý jáne tuzdanǵan aımaqtarda sor shaıý jumystary uıymdastyrylýda.
«Búginde oblysymyzda jaıylymdardy sýlandyrý boıynsha qudyqtar qazý jumystary jalǵasýda. Máselen, 2015 jyly oblysymyzda 202 qudyq qazylsa, onyń 47-si sýbsıdııalandy. Al, 2016 jyly 273 qudyq qazylyp, onyń 272-si sýbsıdııalanǵan. 2017 jyly 167 qudyq qazylyp, onyń 105-i sýbsıdııalanyp otyr. 2018 jylǵy jospar boıynsha oblysymyzda 120 qudyq qazylatyn bolsa, 2019 jyly olardyń sany 200-ge jetkizilmek», - deıdi Ilıas Quramysov.
Budan bólek, aldaǵy jyly oblysymyzda aýyl sharýashylyǵy daqyldarynyń egis kólemi 802,5 myń gektarǵa ulǵaıtylatyn bolady. Sondaı-aq, aldaǵy 4 jylda 209 myń 700 turǵyny bar 84 eldi mekendi ortalyqtandyrylǵan aýyz sýmen qamtý josparlanyp otyr.
Sonymen qatar, oblysymyzda jańartylatyn energııa kózderiniń 14 jobasy júzege asyrylyp jatyr. Jalpy qýaty 173,3 MVt quraıtyn 10 jobany 2025 jylǵa deıin júzege asyrý josparlanǵan. «Jasyl ekonomıka» tujyrymdamasyna sáıkes oblysta búgingi tańda qaıta óńdelgen qaldyqtar kólemi 1,4 mln. tonnany qurap otyr.
Atqarylǵan jumystarǵa qanyqqan óńir basshysy aldaǵy jyldary atqarylatyn jumystardy júıelep, «Jasyl ekonomıka» tujyrymdamasynyń tolyqtaı oryndalýyna kúsh salýdy tapsyrdy.
«Búgingi kúnge oblysymyzda jınaqtalǵan qaldyqtar kólemi 18,3 mln. tonnany quraıdy. Onyń 14,1 mln. tonnasy óndiristik, 4,2 mln. tonnasy turmystyq qaldyqtar. Bir sózben aıtqanda qaldyqtardyń ortasynda otyrmyz. Endigi kezekte qaldyqtardy qaıta óńdeý arqyly túrli zattar shyǵaryp, kádege jaratýymyz kerek. Sondyqtan qaıta óńdeý máselesin qolǵa alý úshin shuǵyl jospar qurýdy tapsyramyn», - dedi Janseıit Qanseıituly.
Májilis barysynda «Qazaqstan Respýblıkasynda bilim berýdi jáne ǵylymdy damytýdyń 2016-2019 jyldarǵa arnalǵan memlekettik baǵdarlamasyn» iske asyrý barysy da talqyǵa tústi.
