Búgin ınstagramdaǵy paraqshasynda óziniń álemdik týrnesi ótetinin habarlaǵan Dımash asyl armandarynyń oryndalyp jatqanyn hakim Abaıdyń óleńderi arqyly órnektedi. Qazaq ánshisiniń sheteldegi tuńǵysh shyǵarmashylyq keshi jaıly bilý úshin "Dımash-Əlı" shyǵarmashylyq ortalyǵynyń jetekshisi, Dımashtyń ákesi Qanat Aıtbaevqa habarlasqan bolatynbyz.
«Qytaıdyń aýmaǵynda ótetin Dımashtyń jeke konserti 16 jeltoqsan kúni Chańsha qalasynda bastalady. Qańtar aıynda taǵy bir úlken qalalardyń birinde jalǵasady. Bul 27 maýsymda EKSPO-nyń aıasynda ózimizdiń týǵan jerimizde, Astana qalasynda ótken konserttiń jalǵasy ispetti», degen Q.Aıtbaev konserttiń ereksheligi men ulynyń shyǵarmashylyǵyndaǵy jańalyqtar týraly aıtty.
«Árıne, ár eldiń tildik ereksheligine baılanysty konserttik baǵdarlamalarǵa ózgerister engizemiz. Iаǵnı, aǵylshyn, fransýz tilderindegi ánderden bólek qaı elge barsa sol eldiń tilindegi shyǵarmalarǵa kóbirek basymdyq beriledi. Alaıda, Dımashtyń keshi qaı memlekette ótse de álemdik órkenıetke qosylǵan qazaqtyń ánderi erekshe dáripteletini sózsiz. Bul jaǵynda halyqaralyq deńgeıdegi kóptegen kompozıtorlarmen jumys jasalyp jatyr. Onyń barlyǵy Dımashtyń repertýaryna engiziletin bolady. Sonymen qatar, án jınaqtary da daıyndalyp jatyr», dedi ol.
Qanat Qudaıbergenulynyń aıtýynsha Dımashtyń shetelde ótetin tuńǵysh konsertiniń bıletteri 20 qarashadan bastap resmı túrde satyla bastaıdy. Aldyn ala bıletke tapsyrys bergenderdiń qarasy da kóp ekenin aıtqan Qanat Aıtbaev Qytaıdan ózge elderden de habarlasyp jatqan jankúıerlerdiń az emes ekenin, Qazaqstandaǵy birneshe fan klýbten de qazaq balasynyń álemdik sahnadaǵy óner keshine baratyny týraly habarlamalar kelip túskenin jetkizdi.
«Dımashtyń halqymyzdyń ónerin álemdik sahnaǵa shyǵarsam, álem jurtshylyǵy da qazaq mýzykasynan sýsyndasa degen maqsattary oryndalyp jatyr. Bala kúnnen bergen suhbattarynda aıtyp, shyǵarmalarynda jazǵan armandaryna eńbektiń nátıjesinde jetip jatqanyna biz de qýanyshtymyz. Oǵan bundaı is-sharalar úlken serpin beredi. Astanada ótken konsertinen alǵan shabyt osy sahnaǵa shyǵýǵa jetelep otyr. Sondyqtan da Qytaıdaǵy án keshi sheteldegi eń aýqymdy konsertterdiń alǵashqysy bolyp sanalady. Chańsha qalasynan keıingi sahnalardy kórermenniń suranysyna qaraı otyryp naqtylaıtyn bolamyz», dedi shyǵarmashylyq ortalyqtyń jetekshisi.
Al Qytaı saıttarynyń jazýynsha Chańshadaǵy 100 myń kv metr aýmaqtaǵy halyqaralyq kórme ortalyǵynda ótetin ən keshin 30 myńdaı kórermen tamashalaı alady eken. Bir qyzyǵy, olar konserttiń qaı kúni ótetini belgili bolmaı turyp-aq osy qalalarǵa bılet alyp, qonaq úılerge tapsyrys ta berip qoıypty. Weibo.com saıtynyń habarlaýynsha Dımashtyń Qytaıdaǵy kelesi shyǵarmashylyq keshi 2018 jyly 6 qańtarda ótýi múmkin.
Maıgúl SULTAN,
«Egemen Qazaqstan»
