Bul oqıǵa el esinde. Aman-saý júrgende Dosbol 20 jasqa tolatyn edi. Shardara aýdanyndaǵy Kóksý aýyldyq okrýgine qarasty Aıdarqul-Qashar eldi mekeninde ómirge kelgen batyr uldy týǵan-týystary men dos-jarandary, ustazdary men aýyldastary jaqynda S.Erýbaev atyndaǵy jalpy orta mektebinde ótken is-shara barysynda eske aldy.
«Beıbit kúnniń batyry» taqyrybymen ótkizilgen keshte Dosbol týraly arnaıy fılm kórsetildi. Mektep dırektory Bıbimárııam Qarsaqbaeva aldymen qonaqtardy Dosbol Saparǵa arnap jasalǵan buryshpen tanystyrdy. Ustazdary únemi jymıyp júretin, tapsyrmalardy tyndyrymdy oryndaıtyn tilalǵysh shákirtin tebirene eske aldy. Júrekten shyqqan jyr shýmaqtaryn arnady. Qyrshyn ketken ulyna degen saǵynyshyn anasy Juldyz Qudabaeva da jyr shýmaqtarymen jetkizdi. Ákesi Erkinbek Ábdiqadyrov mektep ujymyna alǵys aıta otyryp, Aqtóbe qalasyndaǵy №6655 áskerı bólim shyǵarǵan kitapty syıǵa tartty.
– Biz Dosboldy nelikten batyr dep aıtamyz? Sebebi ol qara nıetti qaskóılerdiń alǵashqy shabýylyna toıtarys berdi. Eger Dosbol men qasyndaǵy serikteri jaýǵa qarsy turmaǵanda olar qarý-jaraq bólmesine basyp kirip, myńdaǵan adamnyń ómirin qııatyn edi. Sondyqtan da búgingi is-sharanyń mańyzy óte zor. Aldaǵy ýaqytta mundaı eske alý keshin aýdandyq deńgeıde uıymdastyrsa, jas urpaq úshin tárbıelik máni joǵary bolady dep oılaımyn, – dedi aýyl turǵyny Tursynqul Baıturǵanov.
Jıyn sońynda Dosbol Sapardy eske alýǵa arnalǵan voleıbol jarysy uıymdastyrylyp, arnaıy as berildi.
Ǵalymjan ELShIBAI,
«Egemen Qazaqstan»
