Oralym, shyqtyń aldymnan,
Oralym meniń, Oralym!
Qol sozyp qyzyl vagonnan,
Ústińnen ótip baramyn.
Oralym, seniń qoınyńda
Oınaqtap ótken jyldarym.
Jarqyldap Jaıyq boıynda,
Dostarmen saıran qurǵamyn.
Shaǵannyń boıy kók shalǵyn,
Shalqamnan jatqam shańqaı
tús,
Gúl bolyp meniń qushaǵym,
Keýdeme qonǵan bulbul qus.
О́mirdiń altyn kesesin
Tosqamyn aıdyń nuryna.
Keshkenmin sovet kóshesin,
Keýdemdi ashyp qurbyma.
Sonaý bir shette, sonaý úı,
Keter me, sirá, kóńilden?
Alýshy ed tartyp meni ylǵı
Mahabbat, jastyq lebimen.
Tereze aldy – jas terek,
Tur eken kimder súıenip?
Júr eken kimder erkindep,
Júregin ustap úıge enip?..
Saǵyndym seni, Oralym,
Kúnder joq beıbit burynǵy.
Kelgenshe qaıtyp oralyp,
Alyp qal osy jyrymdy.
Sirkirep jańbyr jaýǵanda
Baıqarsyń óziń anyqtap:
Janym bir júzer aýańda,
Aýańda seniń qalyqtap.
Qosh bolshy endi, Oralym,
Kúle ber shalqyp, saıranda!
Aıtpaqshy qaıda boranyń?
Keteıin alyp maıdanǵa!
