Astanada úkimettik emes uıymdar jumysy talqylandy

Májilis depýtaty Qýanysh Sultanov tóraǵalyq etken jıynda 2016-2020 jyldarǵa arnal­ǵan ÚEU men memlekettiń ynty­maqtastyǵyn damytý jónindegi jalpyulttyq is-qımyl josparyn, 2016 jyly VII Azamattyq forýmnyń usynymdaryn iske asyrý máseleleri talqylandy. 

Osy másele tóńireginde Din isteri jáne azamattyq qoǵam mınıstri Nurlan Ermekbaev atalǵan taqyrypta baıandama jasady. Vedomstvo basshysy úkimettik emes uıymdarmen ózara is-qımyldy sıpattaıtyn negizgi baǵyttar jóninde áńgimelep berdi. Onyń aıtýynsha, mınıstrlik Azamattyq forým men ÚEU-men ózara is-qımyl jónindegi úılestirý keńe­siniń jumysy júrgizilmek. Onda atal­ǵan salany zańnamalyq jáne ınstıtýsıonaldyq damy­tý­dyń mańyzdy máseleleri she­shi­ledi. Mınıstrdiń aıtýyn­sha, aımaqtaǵy úkimettik emes uıymdarmen de ózara is-qı­myldy úılestirý josparda bar. 
«Mınıstrliktiń bastamasymen 2017 jyldyń basynan azamattyq sektor ókilderimen birlesip halyqty tolǵandyratyn ózekti máselelerge monıtorıng jasaý jáne jınaqtaý jumysy júrgizilip keledi. Búginge deıin 130-dan astam suraq anyqtalǵan. Osy máseleler boıynsha jı­naq­talǵan derekter Úkimetke joldandy. Sonymen qatar tıisti tap­syr­­malar berilip, onyń oryndalý ba­rysy mınıstrliktiń na­za­ryn­da bolady», dedi N.Er­mek­baev. 
Mınıstr, sondaı-aq, erik­ti­lerdiń jumysyn úılestirý, aza­mattyq qoǵam jónindegi zań jobasy, áleýmettik baǵdarlamalardyń sapasyn arttyrý tóńireginde de sóz qozǵady. Mınıstrdiń sózine súıensek, birinshi ret ótkizilgen respýblıkalyq Qoǵamdyq keńes májilisiniń qorytyndylary boıynsha atalǵan uıymnyń tájirıbesi men olardyń qyzmetin jetildirýge arnalǵan usynymdar tujyrymdalǵan. Budan bólek, ÚEU-larǵa granttar bólý qa­ǵı­dalary tolyqtyrylǵan. Ve­dom­stvo basshysy keltirgen de­rek­ter boıynsha, 2016 jyly 208 mıl­lıon teńgelik 11 joba júzege asyrylǵan. Bıyl qarjy­lan­dyrý kólemi 3 esege ósip, 608,5 mıllıon teńgeni qurap otyr. 

Talqylaýǵa qatysqan sarapshylar bılik pen qoǵamnyń kúsh-jigerin biriktirý árbir adamnyń quqyqtary men bostandyqtaryna qatysty konstıtýsııalyq normalardy iske asyrýǵa múmkindik beretinin atap ótti. Sondaı-aq olar Azamattyq forým men ÚEU-men ózara is-qımyl jónindegi úılestirý keńesimen turaqty ashyq dıalog júrgizilýin joǵary baǵalady. Komıssııa otyrysynda tujyrymdalǵan usynymdar Memleket basshysynyń, Parlament pen Úkimettiń nazaryna usynylady.

Abaı ASANKELDIULY,
«Egemen Qazaqstan»