Onda Avtomobıl joldary komıteti tóraǵasynyń orynbasary Amangeldi Bekov «Nurly jol» baǵdarlamasy boıynsha júzege asyrylǵan jobalar men aldaǵy josparlar jóninde baıandap, tilshilerdiń suraqtaryna jaýap berdi.
Baǵdarlama aldaǵy bes jyl ishinde qurylystyń bes negizgi baǵytyn teń damytýdy kózdeıdi. Bul – Ortalyq – Soltústik, Ortalyq-Shyǵys, Ortalyq – Ońtústik, Ortalyq – Batys jáne Almaty – Shyǵys avtojol jobalary. «2015-2016 jyldarǵa arnalǵan «Nurly jol» memlekettik baǵdarlamasyn iske asyrý bastalǵannan beri respýblıkalyq mańyzy bar 2 myń shaqyrym avtokólik joly salynyp, qaıta jańartylýda. Onyń ishinde 1,3 myń shaqyrym jol 1 jáne 2 tehnıkalyq sanat parametrleri boıynsha paıdalanýǵa berildi. «Batys Eýropa – Batys Qytaı» halyqaralyq tranzıttik dálizi, Astana – Temirtaý, Almaty – Qapshaǵaı, Kókshetaý –Petropavl ýchaskeleri tolyǵymen aıaqtaldy», dedi komıtet ókili.
Barlyq jobalar boıynsha jumysqa 75 myń adam tartylǵan, otandyq óndirýshiler materıaldarynyń úlesi 93 paıyzdy qurapty. Amangeldi Bekovtiń aıtýynsha, baǵdarlama aıasynda júrgizilgen jumystardyń nátıjesinde jaqsy jáne qanaǵattanarlyq jaǵdaıdaǵy joldardyń úlesi 85 paıyzǵa jetken. Bıyl Ortalyq – Ońtústik, Ortalyq – Shyǵys, Beıneý – Aqtaý, Aqtóbe – Atyraý, Qapshaǵaı – Taldyqorǵan, Astana – Petropavl jáne Oral – Kamenka jobalarynyń qurylys jumystary jalǵasty. Olardyń jalpy uzaqtyǵy – 1,2 myń shaqyrym. Sonymen qatar uzaqtyǵy 2,5 myń shaqyrym bolatyn Qandyaǵash – Maqat, Jetibaı – Jańaózen, Qurty – Býrylbaıtal, Taldyqorǵan – О́skemen, Merki – Býrylbaıtal, Kalbataý – Maıqapshaǵaı, Úsharal – Dostyq, Beıneý – Aqjigit, Taskesken – Baqty, Osınov asýy, Shýche – Zerendi jańa jobalaryn iske asyrý bastaldy. Jyl aıaǵyna deıin jalpy uzaqtyǵy 0,7 myń shaqyrymdy quraıtyn Aqtóbe – Qandyaǵash, Atyraý – Astrahan, Uzynaǵash – Otar, Astana qalasynyń Ońtústik – Batys aınalma joly, Qostanaı – Denısovka aınalmaly joly jobalary boıynsha sharttardy bekitý jáne daıyndyq jumystaryn bastaý josparlanyp otyr. Bul jobalardyń arqasynda shamamen 9 myń jańa jumys orny ashylmaq.
«Qazirgi ýaqytta jalpy uzaqtyǵy 174 shaqyrym bolatyn Astana – Temirtaý jáne Almaty – Qapshaǵaı jol ýchaskelerinde aqyly júıe men zııatkerlik kólik júıesin salý boıynsha jumystar júrgizilýde. Bıyl jyl aıaǵyna deıin júıeni tájirıbelik paıdalaný baǵytynda iske qosý josparlanýda», dedi baspasóz máslıhatynda «Qazavtojol» UK» AQ bıznesti damytý jónindegi basqarýshy dırektory Rýstam Isaev.
Aǵymdaǵy jyldyń 1 qazanyndaǵy jaǵdaı boıynsha, aqyly joldan jınalǵan qarjy 1 mlrd teńgeni qurady. Bul byltyrǵy kórsetkishten 4 paıyzǵa artyq.
Ashat RAIQUL,
«Egemen Qazaqstan»
