Bankterdegi qolma-qol aqsha qozǵalysy boıynsha kiris-shyǵys operasııalarynyń somasynda da ósim baıqalady. Oǵan kommersııalyq mekemelerdiń qyzmetteri, shetel valıýtasyn satýdan, jeke tulǵalarmen jasalatyn aýdarymdardan túsken somalardyń kóbeıýi sebep bolyp otyr. Al shyǵys operasııalarynyń somasy zaemdar, jeke tulǵalar aýdarymdaryn berý, eńbekaqy, zeınetaqy jáne járdemaqy tóleý, bankomattardy nyǵaıtý esebinen artty.
О́ńir turǵyndarynyń qolma-qol aqshasyz tólem jasaýǵa mán bere bastaǵany baıqalady. «Sonyń nátıjesinde kórsetkish 52,2 %-ǵa kóbeıdi jáne 52,9 mlrd teńge somasyna 2,9 mln tranzaksııa boldy. Bul respýblıka boıynsha barlyq qolma-qol aqshasyz tólemderdiń jalpy kóleminiń 3,2 paıyzy», deıdi Ulttyq banktiń Atyraý fılıalynyń basshysy Aınur Kósherbaeva.
Oblys boıynsha depozıtter 12 %-ǵa ósken. Qazir bank fılıaldaryndaǵy salymdar 331,3 mlrd teńge boldy, bul respýblıka boıynsha bankterdiń depozıttik bazasynyń jalpy kóleminiń 3%-y. Sondaı-aq nesıe portfeline qatysty kórsetkishterde de ózgeris bar. Bir ǵana tutynýshylyq maqsatta berilgen nesıeler 75,5 paıyzǵa artyp otyr.
«Bıyl zańdy tulǵalarǵa – 134,9 mlrd teńge, jeke tulǵalarǵa – 187,7 mlrd teńge nesıe berildi.О́tken jyldyń sáıkes kezeńimen salystyrǵanda ol zańdy tulǵalar bereshekteriniń azaıýy esebinen 0,2 %-ǵa tómendedi. Zaemdar zańdy tulǵalarǵa ekonomıkanyń ónerkásip, kóterme jáne bólshek saýda, avtokólik quraldaryn jóndeý salalary boıynsha, jeke tulǵalarǵa tutyný maqsatynda berilgen», deıdi A.Kósherbaeva.
Jalpy, aımaqta syrtqy ekonomıkalyq qyzmetpen aınalysatyn 910 sharýashylyq sýbektisi Ulttyq bank fılıalyna tólem balansy boıynsha esep tapsyrady. Jyl basynan beri qarjylyq qyzmetterdi tutynýshylardyń quqyqtaryn qorǵaý máseleleri boıynsha jeke jáne zańdy tulǵalardyń 125 ótinishi qaraldy, onyń 105-i oblys turǵyndarynan túsken.
Baqytgúl BABASh,
«Egemen Qazaqstan»
ATYRAÝ
