Kezdesý barysynda taraptar elimizdiń munaı-gaz sektoryndaǵy qazirgi ahýal men yntymaqtastyq perspektıvalaryn, sonyń ishinde Qarashyǵanaq pen Qashaǵan jobalaryn odan ári damytý máselelerin talqylady.
Memleket basshysy «Royal Dutch Shell» konserni halyqaralyq «EKSPO-2017» mamandandyrylǵan kórmesin uıymdastyrýǵa belsendi atsalysqanyn aıtyp, kompanııa basshylyǵyna rızashylyq bildirdi.
Ben van Berden Nursultan Nazarbaevqa kezdesýge múmkindik týǵyzǵany úshin alǵys aıtyp, Qazaqstan jurtshylyǵyn halyqaralyq kórmeniń tabysty ótýimen quttyqtady.
– Sizdi «EKSPO» kórmesiniń tabysty ótýimen quttyqtaımyn. Men kórmedegi eń tartymdy pavılon – «Nur Álem» sferasynda boldym. Odan alǵan áserim de keremet, – dedi konsernniń bas atqarýshy dırektory.
Ben van Berden bıylǵy 18 qarashada atalǵan ken oryndaryna qatysty ónimdi bólý týraly kelisimge qol qoıylǵanyna 20 jyl tolatynyn aıtyp, olardy iske asyrýda Qazaqstan Prezıdentiniń erekshe ról atqarǵanyn atap ótti.
– Bul jobalar óte jaqsy jáne tıimdi bolyp shyqty. Barlyq shyǵyndar der kezinde óteldi, endi tabys tabý úshin jumys atqarylýda, – dedi Memleket basshysy.
