Atyraýda shyǵarmashylyq keshin ótkizgen aqyn: «Týǵan jerge taǵzym etýdiń maqsaty - elge alǵys aıtý, búginge deıin etken eńbegińdi, jasaǵan jumysyńdy kórsetý, jetken mejeńdi belgileý jáne aldaǵy saparyńdy saraptaý. Jerlesterimmen júzdesip, janyma jiger, qýat pen shýaq alyp ketý úshin Jaıyqqa keldim», - dedi.
«Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynyń «Týǵan jer» jobasy aıasynda ótken sharaǵa Atyraý oblysy ákiminiń orynbasary Álibek Náýtıev, oblystyq mádenıet, arhıvter jáne qujattama basqarmasynyń basshysy Salamat Sabyr, Qazaqstan Jazýshylar Odaǵy basqarma tóraǵasynyń birinshi orynbasary, halyqaralyq «Alash» syılyǵynyń ıegeri Ǵalym Jaılybaı, fılologııa ǵylymdarynyń doktory, professor Qulbek Ergóbek, belgili aqyn, mádenıet qaıratkeri Jaqsylyq Aıjan men kesh ıesiniń otbasy qatysty.
Qazaqstan Jazýshylar Odaǵy basqarma tóraǵasynyń birinshi orynbasary, halyqaralyq «Alash» syılyǵynyń ıegeri Ǵalym Jaılybaı: «О́tegen aqyn – soǵystan sońǵy týǵandardyń býyny. Aqkıiztoǵaı atalǵan kishkentaı aýyldan shyǵyp, qazaq poezııasy degen úlken qasıetti mekennen óz orynyn alǵan aqyn. Kez kelgen jyryn oqysań, aýylyń, anań men ákeń esińe túsedi, shynaıylyǵymen baýraıdy. Bul kesh – kóńildiń merekesi, óleń men saǵynyshtyń, parasattyń merekesi», - degen lebizin arnady.
О́tegen Oralbaıuly – otyzdan astam ánge sóz jazǵan aqyn. Jergilikti ónerpazdarmen birge QR eńbek sińirgen qaıratkeri, ánshi Qurmanbek Álimǵazy men Rıza Qaıyrbaı án shyrqap, keshtiń kórkin keltirdi. «Egemen Qazaqstan» gazetinde bir kezderi ózi de eńbek etken qalamger áli kúnge deıin baılanysyn úzbeı, oıly da ózekti maqalalaryn jarııalap turady. Memlekettik qyzmette júrip te óleń ólkesinen jyraqtamaǵan, 22 kitaptyń avtory, qaıratkerlik pen qalamgerlikti teń ustap, halyqtyń yqylasyna bólengen О́tegen Oralbaıuly týǵan jeriniń tórinde tebirene sóz alyp, óleńderin oqydy.
Baqytgúl BABASh,
«Egemen Qazaqstan».
ATYRAÝ.
Sýretti túsirgen: Erlan ALTYBAEV
