Áýlıekól aýdandyq mýzeıinde shyǵarmanyń tusaýkeseri ótti. Oǵan qostanaılyq belgili qylqalam sheberleri Nıkolaı Goncharov, Oleg Kýskov, «Nur Otan» partııasy jáne Isker áıelder qaýymdastyǵy oblystyq fılıaldarynyń músheleri, mádenıet qyzmetkerleri, zııaly qaýym ókilderi qatysty. Aldymen Bekturǵanovtar týraly. Serik Shyńǵysuly – senator, Rımma Shyńǵysqyzy – pedagogıka ǵylymdarynyń doktory, kóp jyldar Qostanaı pedagogıkalyq kolledjin basqardy, «Nur Otan» partııasynyń oblystyq fılıaly tóraǵasynyń birinshi orynbasary qyzmetin atqardy. Qazir de bilim salasynda qyzmet etedi.
– Bul shyǵarmany biz inim Serik Shyńǵysuly ekeýmiz Alash qozǵalysynyń 100 jyldyǵyna arnadyq, sonymen qatar Áýlıekól aýdanynyń 90 jyldyǵy qarsańynda da osyndaı sharanyń ótkeni durys dep bilemiz. Ahańnyń halqymyzǵa jasaǵan rýhanı eńbeginiń, memleketke jasaǵan qaıratkerliginiń aldynda biz máńgilik qaryzdarmyz. Al Bádrısafa sheshemizdiń taǵdyry mahabbatqa adaldyqtyń, qaısarlyqtyń sımvoly tárizdi. Biraq kemeńger adam taǵdyrynyń bizge beımálim jumbaǵy da jeterlik.
Ahańnyń Bádrısafasy biz úshin osyndaı sheshilmegen jumbaq desek te bolady. «Bádrısafa» tarıhı-tanymdyq ekspedısııasy biraz jumys bitirdi. Iýrıı Dmıtrıevıchtiń qylqalamynan shyqqan sýretti mýzeıge syılaýǵa sheshim jasadyq, ol kelýshilerge Ahań men Bádrısafa mahabbaty týraly aıtyp turǵandaı bolady, – dedi Rımma Shyńǵysqyzy.
Kimniń basynan jastyq shaq ótpedi deısiz? О́miri kúrespen ótken Ahań da Qostanaıdyń jazyndaı jastyqtyń qysqa ǵana samalyn sezinse kerek. Deregi qaǵazǵa túspese de, Áýlıekól mektebine kelgen jas muǵalimniń Bádrısafamen osynda kezdeskeni týraly aýyzsha jetken áńgime bar. Aýdan ákimi Jansultan Táýkenov aýdandyq mýzeıge tapsyrǵan portret úshin aǵaıyndy Bekturǵanovtarǵa alǵys aıtty.
– Bádrısafa sheshemizdiń taǵdyry dekabrıster áıelderinen asyp túspese, kem bolǵan joq. Ol Ahańa aıaǵyna deıin adal boldy, «tóresi» úshin otqa da tústi, shoqqa da kúıdi. Taǵdyrdyń salǵanyna qasqıyp qarsy turdy, bárine de kóndi. Ult ustazy Ahmet Baıtursynovtyń shyǵarmalarymen, qaıratkerligimen qatar, onyń taǵdyryn da jas urpaq bilip ósýi tıis. Ahań men Bádrısafanyń mahabbaty, olar bastan keshken beınetti bilýdiń ózi jas býynǵa rýhanı azyq beredi, – dedi Jansultan Qońyrtaıuly.
Tusaýkeserden keıin oblystyq orys drama teatrynyń ujymy Ahań men Bádrısafa taǵdyrynan syr shertetin «Aq kelin» spektaklin qoıdy.
Názıra JÁRIMBET,
«Egemen Qazaqstan»
Qostanaı oblysy,
Áýlıekól aýdany
