Imandylyq oshaǵynyń qurylysy mamyr aıynda «Aýylym – altyn besigim» atty bastamashyl toptyń uıytqy bolýymen qolǵa alynyp, bar bolǵany 5 aıdyń muǵdarynda aıaqtalypty. Bastamashy toptyń múshesi Muhtar Esqalıev ıgi iske aýyldyń barsha azamattary úles qosqanyn, stýdentter men oqýshylar da taǵylymdy sharadan tys qalmaǵanyn aıtady.
Meshittiń ashylý saltanatynda sóz alǵan N.Sabılıanov eki myńǵa jýyq turǵyny bar Aıǵyz aýylynda HH ǵasyrdyń 80-jyldarynan beri mundaı ǵımarattar salynbaǵanyn, jańa nysannyń turǵyzylýy aýyl ómirine tyń serpilis, jańa lep ákelgenin atap ótti. «Jańa meshit elimizdegi birlik pen kelisimdi saqtaýǵa, jastardy tárbıeleýge óz úlesin qosatynyna senimdimin. Bul ıgi shara osy aýyl halqynyń uıymshyldyǵyn, bereke-birligin jáne bir-birin qoldaı biletindigin kórsetti», dedi Parlament Májilisiniń depýtaty.
Halyqty ımandylyqqa shaqyratyn ǵıbadat úıiniń qurylys jumystarynyń basy-qasynda bolǵan osy aýyldyń týmalary, búginde týǵan jerden jyraqta júrgen О́mirserik Núrkebaev pen Erbol Rahymjanov saýapty shara ózderiniń ónip-ósken mekenderine degen yqylas-peıilderin odan ári arttyra túskenin jetkizdi.
Azamat QASYM,
«Egemen Qazaqstan»
Shyǵys Qazaqstan oblysy,
Aıagóz aýdany
