Forýmnyń QazUÝ-de uıymdastyrylyp otyrýy kezdeısoq emes. Sebebi Qazaqstan jýrnalıstıkasyna qyzmet etip kele jatqan tilshi mamandardyń birneshe býynyn tárbıelep, ulttyq jýrnalıstıkanyń qalyptasýy jolynda mańyzdy mindet arqalap kele jatqan qarashańyraq osy ýnıversıtet bolyp esepteledi. Ýnıversıtettiń jýrnalıstıka fakýltetinen túlep ushqan bilikti mamandar, syrttan kelgen sarapshy meımandar qoǵamdy rýhanı jańǵyrtý men sananyń ashyqtyǵyn qalyptastyrýda jáne ulttyq biregeılikti nyǵaıtýdaǵy buqaralyq aqparat quraldarynyń rólin, kásibı etıka máselelerin, sondaı-aq kóp etnosty qoǵamda mass-medıa mádenıetin damytý máselelerin talqylaýǵa baılanysty sóz aldy.
Qalaı bolǵanda da, birinshi kezekte qoǵamdyq sanaǵa áser etetin kúsh – jýrnalıstıka. Qoǵamdyq pikirdi qalyptastyratyn aqparat quraldarynyń ókilderi bolǵandyqtan, aqparatty aıqyn, ádil, naqty ári jedel jetkizýde jýrnalıstiń kásibı biliktiligi kún ótken saıyn synǵa túsip keledi.
Tilshiler qaýymyna tegin sabaq úıretetin forýmnyń Assambleıa uıymdastyryp otyrǵan kezekti jıynynyń jóni tipti bólek. Halyqaralyq basqosýdy quttyqtaý sózimen ashqan Darhan Myńbaı: «Rýhanı jańǵyrý ıdeıasynyń aıasynda ótkizilip otyrǵan jıynnyń «Sananyń ashyqtyǵy» dep atalýynyń máni zor. Bul eń aldymen, jetistikke jetý joly. Rýhanı jańǵyrý ashyq sana, izgi oımen qatar júredi. Elimizge shetelden kelgen sarapshylar kópultty memleket jaǵdaıynda jýrnalıstıkanyń qalaı damyp otyrǵanyn óz kózimen kórip, tájirıbe úırenip, paıdaly oı túıip otyr. Etnosaralyq másele óte názik, shetin másele bolyp esepteledi. Etnos týraly aıtatyn jýrnalıst eń aldymen etıka normalary týraly bilýi tıis. Bul taqyryp jýrnalısten óte obektıvti bolýdy, jan-jaqty zerttep, zerdelep baryp kóterýdi talap etedi. Ult, ulys týraly ıdeıalar, ultaralyq qarym-qatynas máselesin BAQ betinde kóterýdiń, jazýdyń, saraptaýdyń qyr-syry, ıirimderi osyndaı alańdarda aıtylyp, talqylanady. Bolashaq jýrnalısterdi daıarlaýda jáne olarǵa durys baǵyt-baǵdar berýde tek stýdent jastar úshin ǵana emes, kásibı jýrnalısterge de mundaı medıa forýmdardyń beretin paıdasy zor», dedi.
Forým aıasynda otandyq jáne sheteldik spıkerlerdiń sheberlik sabaqtary, TEDh konferensııasy, etnostyq BAQ kórmesi ótkizildi. Al jıyn sońynda Qazaqstan halqy Assambleıasynyń jýrnalıstıka salasynda jyl saıyn ótkizetin «Shańyraq» baıqaýynyń jeńimpazdary marapattaldy.
Aıgúl AHANBAIQYZY,
«Egemen Qazaqstan»
ALMATY
