Buǵan deıin kóptegen fılmder túsirgen ári aqyn, ári rejısser Tıýlkın jýrnalısterge bergen suhbatynda Shyǵys Qazaqstan oblysynan taǵdyry, bolmysy eshkimge uqsamaıtyn, ómir úshin kúreste erekshe janqııarlyq tanytyp ǵumyr keship júrgen adam izdegenin aıtty. Biletinder rejısserge eki adamdy nusqaǵan – biri sýretshi, ekinshisi fermer. Ekeýi de zaǵıp, ekeýi de jankeshtilikpen ómir súrip jatqan jandar eken. Tıýlkın fermerdi tańdapty.
– Shyǵys Qazaqstannyń sonaý bir túkpirinde turatyn fermer Serik Bodanbaevty túsirý úshin tikushaqpen bardyq. Onyń tirshiligimen tanysyp, suhbat alyp, on kún boıy jumys jasadyq. Biraq maǵan birnárse jetpeı qalǵan sııaqty bolyp turdy, – deıdi rejısser.
Kezekti bir áńgime kezinde zaǵıp fermer áıeli aýyryp qalǵanda qystaýdan aýylǵa jaıaý barǵanyn, biraq qınalmaı, adaspaı jetkenin baıandaıdy. Fermerdiń bul oqıǵasy – ózi jaıly derekti fılmniń kilti edi. Derekti fılmde keıipker jol boıy óz ómirindegi eń eleýli oqıǵalardy esine túsiredi. Rejısser joldy adamnyń ómir jolymen shendestirip, keıipkerdiń bastan keshken oqıǵalaryn ómirlik maqsattarǵa umtylystar retinde kórsetken.
«13 kılometr» derekti fılminiń tusaýkeseri endi ǵana ótip jatqanymen, osydan kóp jyl buryn túsirilgen fılm ekenin aıtyp ótýimiz kerek. Sondaı-aq bul dúnıe osyǵan deıin Brazılııada ótken halyqaralyq «Eńserý» kınofestıvalinde jáne Reseıde ótken derekti fılmder festıvalinde arnaıy júldelerge ıe bolǵan.
Qoldaǵy bar aqparattar boıynsha, bul festıvalǵa 10 elden 280 ótinish túsken. Qazylar alqasy sonyń 31-in ǵana tańdap alypty. Nátıjesinde, otandyq «13 kılometr» arnaıy syılyq ıelengen.
Rejısser amandyq bolsa, osy jyldyń jeltoqsanynda Ýfada ótetin halyqaralyq «Kúmis Aqbozat» kınofestıvaline de derekti fılminiń qatysatynyn jetkizdi.
Aıgúl SEIIL,
«Egemen Qazaqstan
