Erkin kúresten Atlanta Olımpıadasynyń qola júldegeri Máýlen Mamyrov, grek-rım kúresinen Beıjiń Olımpıadasynyń kúmis júldegeri Nurbaqyt Teńizbaev, erkin kúresten London Olımpıadasynyń qola júldegeri Aqjúrek Tańatarov, Rıo olımpıadasynyń qola júldegeri Elmıra Syzdyqova, grek-rım kúresinen álem chempıonatynyń kúmis júldegeri Demeý Jadyraev, Azııa chempıony Erbol Qońyratov, erkin kúresten Monreal Olımpıadasynyń (1976) kúmis júldegeri Aleksandr Ivanov 200-ge tarta balǵyn balýandarǵa kúrestiń aıla-tásilderin túsindirdi. Sharany uıymdastyrýǵa uıytqy bolǵan №15 balalar men jasóspirimder sport mektebiniń dırektory Dastan Qanathanovtyń aıtýynsha, mundaı sheberlik sabaǵyn ótkizý jas balýandardyń sheberligin shyńdaı túsedi.
– Qazirgi tańda Almatydaǵy «Halyq Arena», «Almaty Arena», «Dostyq» sport keshenderinde jas balýandardyń kúrespen shuǵyldanýyna keremet jaǵdaı jasalǵan. Sporttyq jekpe-jek jáne kúsh qoldanylatyn sport túrleri konfederasııasy men Grek-rım, erkin jáne áıelder kúresi federasııasynyń qoldaýynyń arqasynda jas balýandarymyz atalǵan sport keshenderinde tegin jattyǵady.
Búgingi ótkizip otyrǵan sporttyq sharada jas balýandarymyz Olımpıada men álem chempıonatynyń júldegerlerinen kúrestiń aıla-tásilin úırenip, sheberlikterin shyńdaı túsetinine senimim zor. Bolashaqta olar da aǵalary sııaqty el namysyn abyroımen qorǵap, kók týymyzdy kókte jelbiretetini sózsiz, – dedi D.Qanathanov.
Sheberlik sabaǵynyń ashylý saltanatynda jas balýandar ataqty balýandarmen qatar turyp, Qazaqstan Respýblıkasynyń Ánuranyn tyńdady. Artynsha, kezek-kezegimen kilemge shyǵyp, ár balýan ózderiniń súıikti ádis-tásilderiniń qyr-syryn kórsetti. Sporttyq sharanyń sońynda jas balýandar ataqty balýandardan qoltańba alyp, estelik sýretke tústi.
Budan keıin Grek-rım, erkin jáne áıelder kúresi federasııasynyń tóreshiler korpýsy jáne bapkerler shtabynyń jumysy jónindegi vıse-prezıdenti Erlan Qojasbaı sheberlik sabaǵyna qatysqan balýandardy «Merkýrıı Medet» sporttyq-saýyqtyrý kesheninde ornalasqan Kúres akademııasyna bastap bardy. Ol jerde balýandar akademııanyń tynys-tirshiligimen tanysty. Erkin kúresten Atlanta Olımpıadasynyń qola júldegeri Máýlen Mamyrov akademııa qabyrǵasynda tálim alyp jatqan jas balýandarǵa aq jol tiledi.
Erkebulan JOMART,
jýrnalıst
