Semeı – eń aldymen uly Abaıdyń eli. Táýelsizdiktiń 1995 jyly Abaı jyly dep jarııalanyp, danyshpannyń 150 jyldyǵy álemdik deńgeıde atalyp ótti. Sodan beri de biraz ýaqyt ótipti. 2020 jyly Abaıdyń týǵanyna 175 jyl tolady. Osy ulyq merekeni óz máninde atap ótýge daıyndyqty búgingi kúnnen bastaǵan jón. Jáne ol elimiz kóleminde ótip jatatyn túrli mádenı-rýhanı sharalardan taqyryby, mazmuny, tipti kólemi jóninen de múlde bólek, tyń turpatty jaǵdaıda uıymdastyrylsa degen tilegimiz bar.
Osy maqsatpen Premer-Mınıstrdiń orynbasary E.Dosaevqa saýal joldap, tómendegi usynystardy jasadyq:
Birinshiden, Semeı qalasynan Abaı eline, Qaraýylǵa, Jıdebaıǵa baratyn joldyń sapasy syn kótermeıdi. Sondyqtan 181 shaqyrymdyq Semeı – Qaraýyl jolyn kúrdeli jóndep qana qoımaı, onyń «Abaı joly» ekendigin aıǵaqtaıtyndaı forma, mazmun berilse, arnaıy eskertkish belgiler ornatylsa eken;
Ekinshiden, Qaraýyl, Jıdebaı syndy Qazaqstannyń tarıhı-mádenı murasy men áleýmettik-saıası ómirindegi mańyzdy oryn alatyn qasıetti oryndar – búginde ulttyq birlik pen jańǵyrý nyshany retindegi nysandar. «Qazaqstannyń jalpyulttyq qasıetti jerlerin» belgileý maqsatynda qurylǵan ǵylymı-saraptamalyq keńes elimizdiń qasıetti jerlerin anyqtaý, ǵylymı tizimdeý men júıeleý barysynda Abaı elin erekshe eskersin;
Úshinshiden, jyl saıyn ótkiziletin respýblıkalyq «Abaı oqýlary» baıqaýynyń aıasyn keńeıtý jáne Abaı shyǵarmashylyǵyn nasıhattaý arqyly urpaqtyń qazaq mádenıetine, tili men ádebıetine degen yqylasyn arttyrý, qazaqstandyq rýhanı birlikti qýattaý, otansúıgishtik sezimdi arttyrý maqsatyn kózdeý kerek;
Tórtinshiden, «Rýhanı jańǵyrý» baǵdarlamasy aıasynda jasalatyn «Qazaqstannyń kıeli jerleriniń kartasy» uly Abaı elinen bastalyp, odan Aqmeshittegi Altyn Shoqyǵa, Tarazdan Terektige, Saýrannan Saraıshyqqa, Qarabýradan Qarahanǵa, Oqshy atadan Oısylqaraǵa jáne ulaǵatty Ulytaýǵa ulassyn degen tilegimiz bar. Osy saýaldaǵy usynystardy qoldap birneshe áriptesterim qoldaryn qoıdy.
Nurlan DÝLATBEKOV,
Májilis depýtaty
