«Aq halatty abzal jan» jerlester forýmyna buryn Taıpaqta dúnıege kelgen jáne qyzmet etken 32 bilikti maman qatysyp otyr. Olardyń beseýi kórshiles Atyraý oblysynan kelipti. Dárigerlermen birge Oral qalasynan alystaǵy aýylǵa jyljymaly flıýrografııa jáne mamografııa avtokeshenderi de jol tartty.
– Shalǵaı aýyldarda medısınalyq qyzmet sapasy men qoljetimdiligin arttyrý maqsatynda oblysymyzdyń bilikti dárigerleri Taıpaq aýylynda boldy. Olar turǵyndardyń hal-jaǵdaıyn tekserip, konsýltasııa berdi. Aýyl halqy maman dárigerlerdi izdep qalaǵa sabylmaı, óz aýylynda júrip densaýlyǵyn túzeýge múmkindik aldy. Mundaı shara bolashaqta basqa aýyldarda da jalǵasyn tabady, – dedi oblystyq densaýlyq saqtaý basqarma basshysynyń emdeý isi boıynsha orynbasary Gúlnár Ábdirahmanova.
Aqjaıyq aýdanynda halyqqa 1 ortalyq aýdandyq aýrýhana, 1 aýyldyq aýrýhana, 11 dárigerlik ambýlatorııa, 4 feldsherlik akýsherlik pýnkt, 29 medısınalyq pýnkt qyzmet kórsetedi. Aqjaıyq aýdandyq ortalyq aýrýhanasy 1974 jyly salynyp, 2016 jyly aýdandyq aýrýhana «Jumyspen qamtýdyń jol kartasy-2020» baǵdarlamasy aıasynda kúrdeli jóndeýden ótken. Aýrýhanada 120 kereýettik 2 stasıonar: hırýrgııa, travmatologııa, gınekologııa, emdeý, balalar, patologııa, perzenthana, juqpaly aýrýlar bólimderi, kardıologııalyq jáne nevrologııalyq ońaltý qyzmet kórsetedi.
Oblystyq densaýlyq saqtaý basqarmasy habarlaǵandaı, 2018 jyly stasıonarda meıirbıkelik jáne palıatıvtik kómek kórsetý josparlanýda. Aýdandyq aýrýhana joǵary medısınalyq jabdyqtarmen qamtamasyz etilgen. Aýdan boıynsha 62 dárigerdiń 17-si, 294 orta býyn medısına qyzmetkeriniń 155-si sanatqa ıe. Sonymen qatar 13 dáriger, 25 orta býyn qyzmetkeri, 3 psıholog maman biliktiligin arttyrý kýrstaryna qatysyp, bilimin jetildirgen.
Qazbek QUTTYMURAT,
«Egemen Qazaqstan»
Batys Qazaqstan oblysy
